17 нас хүрсэн Камила Валиевагийн тухай 17 баримт

ОХУ-ын тамирчин, уран гулгалтын олимпын багийн төрлийн аварга, Европын аварга Камила Валиева өнөөдөр 17 нас хүрч байна.

Өнөөдөр тэр төрөлх Казань хотноо Этери Тутберидзегийн мөсөн шоунд оролцон, гулгах юм. Сэтгүүлчид түүнээс сэтгэгдлийг нь сонирхжээ.
 

-Өнөөдрийн шоу үзэгч дүүрэн байх болов уу?

-Би хүн дүүрэн байх болно гэж найдаж байна. Төрсөн өдрөө ийм сайхан уур амьсгалд өнгөрөөхдөө баяртай байгаа. Казаньд амьдардаг манай гэрийнхэн, анд нөхөд ордонд ирэх болно.

-Этери Тутберидзе төрсөн өдөрт чинь зориулан, Казаньд шоу хийхээр төлөвлөсөн юм уу?

-Мэдэхгүй юм, гэхдээ тийм байгаасай гэж хүсэж байна.

-Өөртөө төрсөн өдрөөрөө юу хүсэж байна вэ?

-Тайван амгалан байж, амьдралынхаа үе мөч болгонд баярлаж байхыг л хүсмээр байна.
 

Ингээд арав хүрэхгүй хоногийн дараа Монголд ирж, ур чадвараа толилуулах гэж байгаа Камилагийн төрсөн өдөрт зориулан, түүний тухай 17 баримтыг толилуулж байна.

1. Камила Валиева Казаньд татар гэр бүлд төрсөн. Багадаа маш их өвчин тусдаг байсан тул спортоор хичээллүүлэхээр аав, ээж нь шийджээ. Ингээд 3 настайгаасаа уран гулгалтаар хичээллэсэн юм. Мөн балет, гимнастикийн дугуйланд явж байсан ч уран гулгалтаа сонгожээ.
 

2. Уран зургийн авьяастай. Чөлөөт цагаараа шигтгээ наамал хийдэг.

3. 2017 онд Москвад ирж, алдарт Этери Тутберидзегийн шавь болсон. Камила Алина Загитоваг шүтэн биширдэг.
 

4. Бээжингийн олимпын гулгалтыг нь Холливудын жүжигчин Алек Болдуин агуу урлаг хэмээн нэрлэсэн байдаг.

5. Бээжин олимпын богино гулгалтаа тэр тэнгэрт одсон эмээдээ зориулан, гулгасан байна.
 

6. Камила зодог тайлаад сэтгэл зүйч эсвэл уран гулгалтын шүүгч болох зорилготой.

7. Тэр аялах дуртай. Очих дуртай орон нь Япон, Тайланд, Швейцар.

8. Нисэх буудал очих замд хамгийн их догдолдог, сандардаг гэнэ.

9. Математик, алгебрын хичээлд дуртай. Тэмцээн уралдаан, бэлтгэл сургууль их тул ихэнхдээ ганцаарчилсан сургалт авдаг ажээ.
 

10. Померан шпиц үүлдрийн нохойтой. Лева нэртэй тус нохойг Францын Гран При тэмцээний дараа фэнүүд нь бэлэглэжээ.
 

11. Испанийн алдарт зураач Пабло Пикассогийн зээ охин Диана Пикассо 2018 онд түүний “Бөмбөлөг дээрх охин” үзүүлбэрийг үзээд шүтэж, Парисын Пикассогийн музейд урьж байв.

12. Татар үндэсний хоол болох татар лапша, кыстыбый, эчпочмакад дуртай. Чөлөөт цагаараа ээж, эмээдээ гал тогоонд тусалж, өөрөө ч хоол хийх сонирхолтой.
 

13. Хөзөр, ширээний карт тоглоом тоглох дуртай. Гэхдээ ялахын тулд биш инээж, баясахын төлөө тоглодог байна.

14. Тэмцээний үед үзүүлбэр хийхийнхээ өмнө тайвшрахын тулд хэрээс – тэг тоглодог. Урьд нь гүйж, харайж, төвлөрөх гэж оролдсон ч бүтээгүй гэнэ.
 

15. Камила амьдралдаа хэд хэдэн зарчим баримталдаг. “Бүх хүнтэй эелдэг бай”, “Бууж өгөлгүй, зорилгодоо хүр”, “Үргэлж өөдрөг бай”, “Байнга шинэ танилтай болохыг хичээ”, “Эцэг эхээ хүндлэх”.

16. 2017 онд хүнд гэмтэл аваад зодог тайлах шахаж байсан.

17. Хурд, бас дахин хурд. Тэшүүрээр гулгахдаа төдийгүй унадаг дугуй, самокат, цахилгаан дугуйгаар ч дэндүү хурдан давхидаг гэнэ.