Шинэхэн аав Сун Жүн Ки интернэт хэрэглэгчдийн бухимдлыг төрүүлэв

Өмнөд Солонгосын жүжигчин Сун Жүн Ки хэдхэн хоногийн өмнө анхны хүүхдээ өлгийдөн авсан билээ. Дөнгөж төрсөн хүүгийнхээ гарны зургийг олон нийтийн сүлжээндээ байршуулсан түүнд дэлхийн өнцөг булан бүрээс баяр хүргэсэн. Гэвч түүний Хятадын хэвлэл мэдээллийн хэрэгсэлд өгсөн ярилцлага зарим хүмүүст буруу ойлголт төрүүлжээ. 

Сэтгүүлч түүнээс гэр бүлийн амьдрал болон хувийн карьер нь улам бүр өсөж дэвжиж байгааг онцлоод хэр байгаа тухай асуухад Сун Жүн Ки "Заримдаа аав байна, нөхөр байна гэдэг нь энэ салбарт ажилгүй болохтой ижил зүйл. Аав болж, нөхөр болж, хүнтэй гэрлэх нь заримдаа ажлаа илүү ихээр алдаж байгаа мэт санагддаг" хэмээжээ. 

Эмэгтэй хүмүүс хүүхдээ тээж, төрүүлэх үедээ маш олон зүйлс золиослодог. Харин эрэгтэй хүмүүсийн хувьд гэр бүлээ тэжээхийн тулд илүү их хөдөлмөрлөх шаардлагатай болж, ажилдаа амжилт гаргах нь ихэсдэг хэмээн интернэт хэрэглэгчид шүүмжилж эхэлжээ. Энэ нь нэг талаараа эмэгтэйчүүдийг үгүйсгэж байгаа хэлбэр гэх шүүмжлэл олон нийтийн сүлжээнд тархаад байгаа аж. 

Өмнөд Солонгост гэр бүлтэй эмэгтэйчүүдийн ажлын бүтээмж буурдаг хэмээн үздэг учраас хүндрэл гарах нь бий. Харин Сун Жүн Кигийн хувьд ийн ярьсан нь олон эмэгтэйчүүдийг үл тоомсорлож буй хэрэг хэмээн тэд үзэж байгаа аж.