Москва орчим алан хядах ажиллагаа болсны улмаас 60 хүн амиа алдав

ОХУ-ын Москва орчмын Красногорск хотын “Крокус сити холл” төвд үл таних этгээдүүд гал нээсний улмаас 60 хүн амиа алдаж, 100 гаруй хүн шархаджээ. Тус төвд “Пикник” хамтлагийн концерт болж байжээ.

Москва хотын болон Москва орчмын оршин суугчдыг цусаа хандивлахыг эрх баригчид уриалж байна.

ОХУ-ын Эрүүл мэндийн яамны мэдээллээр, 115 хүн эмнэлэгт хүргэгдсэнээс тав нь хүүхэд. 60 хүний биеийн байдал хүнд байна.

Үл таних этгээдүүд Калашников автомат буугаар зэвсэглэсэн байсан бөгөөд их хэмжээний сум, зэр зэвсэгтэй байжээ.

Цогцолборт буун дуу гарсны дараа, дэлбэрэлт болж, улмаар гал гарсан байна. Барилгын 30 хувь нь галд автаж, гал сөнөөгчид нийт 100 хүнийг нүүлгэн шилжүүлжээ. Гал унтраахад нисэх хүчнийг дайчилж, нисдэг тэрэгнээс нийт 160 тонн ус асгасан байна. Галыг орон нутгийн цагаар 0.55 цагт цурамд оруулсан байна.

ОХУ-ын Мөрдөн шалгах хороо алан хядах ажиллагаатай холбогдуулан эрүүгийн хэрэг үүсгэн, шалгаж байна.

Нөхцөл байдалтай холбогдуулан Москва хотын Улаан талбайг бүрэн хамгаалалтад авч, нисэх онгоцны буудал, вокзалд аюулгүй байдлын арга хэмжээг чангатгаад байна.

Москва хот болон Москва орчимд олон нийтийн бүх арга хэмжээг цуцалжээ.

Олон улсын реакци

Цагаан ордон болсон үйл ядалтай холбогдуулан эмгэнэл илэрхийлсэн байна.

Риа Новости агентлагийн мэдээлснээр, АНУ гуравдугаар сарын эхээр Москва хотод алан хядах ажиллагаа явуулахаар бэлтгэж буй тухай мэдээлэл авч, Оросын эрх баригчдад анхааруулсан бөгөөд өөрийн иргэдийг олон нийтийн арга хэмжээнд оролцохгүй байхыг сэрэмжлүүлж байв.

Украины Ерөнхийлөгчийн тамгын газрын даргын зөвлөх Михаил Подоляк Киев болсон үйл явдалд холбоогүй хэмээн мэдэгджээ.

Олон улсын төр, засгийн тэргүүнүүд эмгэнэлээ илэрхийлж байна.