Буриадын тариаланчид Монгол руу хүмүүнлэгийн тусламж илгээсээр байна

Буриадын томоохон фермерийн аж ахуй эрхлэгчид Монгол Улсад хүмүүнлэгийн ачаа бараа бэлтгэжээ. Буриад улсын найман ферм Монголын малчдад тусламж үзүүлэх зорилгоор үр тариа хурааж, ийнхүү илгээж байгаа гэнэ.

Буриадын хөдөө аж ахуйн салбарынхан ах, дүү Монгол Улс руу хүмүүнлэгийн тусламж болгон илгээхээр үр тарианы тэжээлийг ачсаар байгаа юм. Өнөөдрийн байдлаар 235 ачааны машин 7151.93 тонн улаан буудай, овъёос, арвай илгээлээ хэмээн Буриад улсын Хөдөө аж ахуй, хүнсний сайд Галсан Дареев онцлов.

Буриадаас хөрш улс руу нийтдээ 8.5 мянган тонн үр тариа илгээнэ. Бүгд найрамдах улсын Баргузин, Бичурск, Заиграевский, Кабанский, Курумкан, Хиагт, Мухоршибир, Тарбагатайн 27 ферм үр тариагаа сайн үйлсэд нэгдэн хандивлажээ.

Буриад улсад гурав дахь жилдээ үр тарианы нийт ургацыг нэмэгдүүлэх хандлага ажиглагдаж буй. 2023 оны үр дүн сүүлийн 23 жилийн дээд амжилтаас давжээ. Үр тарианы нийт хураалт 140.6 мянган тонн болсон нь 2022 онтой харьцуулахад 20.5 хувиар өссөн үзүүлэлт юм. Үр тарианы дундаж ургац 20.7 ц/га байна.

“Куйтун ХХК”-ийн захирал Григорий Мясников “Монголд нөхцөл байдал хүндэрсэнтэй холбоотойгоор Буриадын тэргүүн бүх тариаланчдад хандан “Хөрш монголчуудаа дэмжье” хэмээн уриалсан. Одоо дараагийн ачааг монгол ахан дүүстээ ачиж байна. Буриадын бүх том фермүүд нийлж тариа будаа цуглууллаа. Бид зургаа дахь машин будаагаа бэлдлээ. Өмнө нь дөрвөн машин буудай явуулсан, одоо овъёос ачиж байна. Манай аж ахуйгаас нийт 150 тонн. Өнгөрсөн жил ургац сайн авсан, 6000 гаруй тонн ургац хураасан, үр тариа сайн байна. Өөрсдөө үр тариа, өөр өөр үрсэлгээ, төрөл зүйлээр үржүүлдэг” гэв.