Д.Хүдэрбулга тавын даваанд Э.Батмагнайг амлалаа

Улсын их баяр наадмын тавын давааны ам авч дууслаа. Дархан аварга Н.Батсуурь улсын начин Б.Чимэдванданг эхэлж авсан. Үүний дараагаар улсын цолтнууд тавын даваанд шалгарсан аймгийн 9 арслангийн долоог нь цувуулж авлаа.

Энд арслан Э.Оюунболд Хэнтийнхээ Ш.Отгонтөгсийг авсан бол улсын заан Д.Анар Дорнодынхоо М.Бэлтгүтэйг амлалаа. Энэ хоёр бол нутгийнхаа дүүг дэмжих гэсэн ам байж мэдэх юм.

Завханы улсын заан М.Лхагвагэрэл өмнөх даваанд аймгийн арслан Д.Алтанцоожтой цаг гаруй барилдсан улсын харцага О.Мөнх-Эрдэнийг, улсын заан Д.Хүдэрбулга улсын начин Э.Багмагнайг амлалаа.

Энэ даваанд улсын харцага Б.Цэдэнсодном, улсын начин Л.Энхсаруул нарыг хэн ч амлалгүй туналаа. Улсын начингийн хувьд ийнхүү хоёр жилийн наадам дараалан тавын даваанд тунаж байна.