Улсын начин Л.Энхсаруулын онцгой сайхан амжилт

Энэ наадмын онцгой нэгэн бөх нь улсын начин Лхагвасүрэнгийн Энхсаруул болж байна. Тэрбээр тавын даваанд гарсан 32 бөхөөс улсын харцага Б.Цэдэнсодномтой тунаж барилдахдаа тохой сөхөж тосгуулж хавираад тун даацтай мэхээрээ давлаа.

Ингэснээр тэрбээр өсөх идэр чимэг ямар ч байсан цол дээрээ нэмээд байна. Одоо зургаагийн давааны амыг хүлээх болно.

Увс аймгийн Ховд сумын уугуул Л.Энхсаруул ноднин жилийн наадмаар мөн тавын даваанд аймгийн арслан Ц.Төмөрцоожтой тунаж барилдан, улсын начин цолны босго давсан хүчтэн. Ийнхүү хоёр жил дараалан тавын даваанд тунаж давснаар Монгол бөхийн түүхэнд ихэвчлэн том цолтой бөхчүүдийн замналд тохиолддог замаар орж явна.