Олимпын хошой аварга бүсгүй уулын чулуунд дарагдан, нас баржээ

Олимпын хошой аварга тамирчин, Германы алдарт биатлонч Лаура Дальмайер Пакистаны ууланд нурж буй чулуунд дарагдан нас барсан золгүй явдал гурав хоногийн өмнө болжээ.

Пёнчаны өвлийн олимпын наадмын биатлоны ойрын гараа болон хөөх гараанд түрүүлж, хоёр алтан медаль хүртсэнийхээ дараахан Дальмайер цаашид энэ спортоор өрсөлдөн тэмцэлдэх хүсэл эрмэлзлэлгүй болж, 25 настайдаа их спортоо орхисон юм.
 

Тэрбээр Германы Баварийн ууланд орших Гармиш-Партенкирхэн хэмээх уулархаг жижиг газрын охины хувьд үргэлж өндөр ууланд авирах дуртай байжээ. Энэхүү хоббигоо даган олон ч оргилд гарсан байна.

“Биатлоны тамирчин байхдаа ч би ууланд гарч, тэндээс эрч хүч авдаг байлаа. Ууланд гарахад сэтгэл сэргэж, анхаарлаа бүрэн төвлөрүүлж, тулгарсан асуудлыг хэрхэн шийдэх шийдэл олоход амархан болдог” гэж Лаура Дальмайер ярьж байсан юм.

2022 онд түүний уулчин найз залуу ууланд авирч байхдаа цасан нурангид дарагдан нас баржээ. Үүний дараа ч Лаура үргэлжлүүлэн ууланд авирч, өөрийн хүсэл тэмүүллээ дагасаар байж. Гэвч эцэстээ Пакистаны ууланд 5700 метрийн өндөрт чулуунд дарагдан нас баржээ.
 

Аврагчид нисдэг тэргээр Лаура Дальмайерийн хаана байгааг олсон ч бороотой, эгц шовх өндөр ууланд бууж аврах аргаа ололгүй тэнд нь орхижээ. Гэр бүлийнхнийх нь мэдэгдсэнээр Дальмайер өндөр ууланд осолдвол цогцсыг нь буулгах гэлгүй, ууланд орхиорой гэж захиж байсан гэнэ.

Дөнгөж 31 настай алдарт тамирчин ийнхүү хайртай өндөр ууландаа сэтгэлт залуугаа алдсан шигээ өөрийнхөө амийг ч өгчээ.