Хагдарч гундаагүй “Хайрын дууч” С.Сэрчмаагийн тухай 20 коммент

Нэгэн үе “Хайрын дууч” гэгдэж, охид залуусын сонсох дуртай хит дуунуудыг амилуулж явсан С.Сэрчмаагийн амьдрал, уран бүтээлийн талаар хэн хүнгүй сонирхдог. Ингээд дуучин бүсгүйн тухай сонирхолтой баримтуудыг дэлгэе.

1. Самбуугийн Сэрчмаа гэх энэ бүсгүй багаасаа л урлаг соёлын арга хэмжээнээс салдаггүй нэгэн байж. Хөгжим бүжгийн коллежийн хийл хөгжмийн ангид орсноор түүний мөрөөдөл биелсэн гэдэг.
2. Ангийнхаа охидтой хамт “Эмоушн” нэртэй хамтлаг байгуулж, хамгийн царайлаг гишүүнээр нь тодорсон гэж байгаа.
3. Харамсалтай нь, олонд танигдаад удаагүй байхдаа хамтлагийн продюссер Б.Чинбаттайгаа нэр холбогдож хэвлэлийн баатар болоод амжсан.
4. Хамтлагийн ахлагч Ц.Сарнай энэ бүхэнд их л тэвчээртэй хандсан ч, хайртай залуугаа С.Сэрчмаагаас салгах аргыг төвөггүйхэн сэдэж “Эмоушн” шинэ гишүүний эрэлд “сэм” мордсон.
5. С.Сэрчмаа хамтлагаа орхиод ганцаараа дуулах болсон төдийгүй хуучин андууд нь Хөгжим бүжгийн коллежоос Б.Солонго гэх бүсгүйг сонгож авчээ.
6. Залуухан, царайлаг дуучин бүсгүй оюутан ахуй цагтаа “Чаплин” бааранд зөөгч хийж байсан бөгөөд зарим хүмүүс түүнийг  “Бааранд тайчиж, ширээний хүүхэн хийж явсан” гэж хардах нь ч бий.
7. Хайрын дуугаар занималдаж явсаар чамгүй амжилтанд хүрсэн С.Сэрчмаа ахиад л хэл аманд орооцолдсон нь гадаадын нэгэн порно кинонд тоглосон гэх хардлага байлаа. Хөгшин хятадтай амраглаж буй бүсгүйн царай үнэхээр түүнтэй адилхан харагддаг юм билээ.
8. С.Сэрчмаа эл асуудлыг тэр дор нь цэгцэлж, Шүүх эмнэлгийн магадлагаа гаргуулсан бөгөөд өөрийгөө тэр кинонд тоглоогүй гэдгийг баахан баталсан. Үнэн эсэхийг нь хэн ч мэдээгүй.
9. Үүний дараа дуучин бүсгүй “Мичид рекордс” студийн захирал Б.Тэмүүлэнтэй үерхэх болсон бөгөөд төд удалгүй хамтдаа амьдарч эхэлсэн билээ.

10.  Хөгжмийн студийн нууцлаг хатагтай маань хит дуунуудаа хялбархан бичүүлж, хөрөнгөтэй эрийн халамжинд умбан хэдэн жил амьдарсан ч хайрын романс нь тэгсхийгээд өндөрлөсөн.

11.  Ахиад л ганц бие бүсгүй болж хоцорлоо. Гэхдээ түүнд шинэ сонголт хийхэд ядах юм байсангүй. “Сонор рекордс” студийн захирал Б.Нэмэхээтэй үерхэж хэсэгтээ л сэтгэл амар явсан гэлцдэг.

12.  2007 онд “Diva’s Mongolia” тоглолтод гавьяат жүжигчин Б.Сарантуяа, Т.Ариунаа, Ж.Алтанцэцэг, Соёлын тэргүүний ажилтан С.Наран зэрэг рок попын шилдгүүдтэй хамт оролцож поп Дива хатагтай нарын нэг болсон тэрбээр “Хайрын дууч” гэх албан бус өргөмжлөлтэй.  

13.  Ээлжит амрагаасаа салсан даруйдаа дуучин бүсгүй урд хөршийг зорьж, номын дуу сонсч яваа дуулдсан. БНХАУ-ын Бээжин хотын Урлагийн их сургуульд суралцаж буйгаа нэг их удалгүй дуулгасан даа.

14.  Харин хэсэг хугацааны дараа гэнэтхэн хуримын товоо зарлаж, рок попынхон С.Сэрчмаагийн урилгыг тэсэн ядан хүлээх болсон. Өвөрлөгч эрийн цайг чанаж, хувийн амьдралаа хэний ч төсөөлж байгаагүйгээр төвхнүүлсэн түүнд олны яриа огт падгүй санагдсан биз.

15.  “Амьдралдаа анх удаа л ийм сайхан хурим үзлээ. Тэгээд бүр “Энэ чинь миний хурим шүү дээ” гээд бодохоор ямар гоё байсан гээч. Үлгэрийн ертөнцөд хөвж яваа юм шиг л...” хэмээн хуримын талаархи сэтгэгдлээ хуваалцсан С.Сэрчмаа үнэхээр аз жаргалтай байж дээ, тухайн үедээ.

16.  Олон улсын эмэгтэйчүүдийн баяраар нөхөр нь 150 мянган ам.долларын үнэтэй “Ranje Rover” машин бэлэглэсэн гэдэг. Дараа нь бүр урлагийн сургууль байгуулж өгнө гээд баахан хөөргөсөн түүхтэй. Хураа нэртэй хөөрхөн охинтой болсон дуучин бүсгүй амаржаад удаагүй байхдаа л сургууль байгуулахаар хөөцөлдөж, рок попын “акул”-уудад багшлах санал тавьсан юм билээ.

17.  Тэр нь даанч бүтээгүй, гэхдээ бас ч гэж хоосон хоцроогүй ээ. Өвөрмонголын зах зээлд зориулсан шинэ цомгоо гаргаж амжсан бүсгүй. Түүнийгээ саяхан худалдаанд гаргасан гэж байгаа.

18.  Хөрөнгө чинээтэй өвөрлөгч эрийн араншин мөдхөн танигдсан уу, яасан. “Дуучин бүсгүйг орхиод охиноо авч зугтсан”, “С.Сэрчмаа нөхрийнхөө машины шилийг хага цохисон”, “Охиноо өөр дээрээ авах гэж зүдэрч явна” гэх мэдээлэл хэвлэлээр цацагдаж эхэллээ.

19.  Удсан ч үгүй, тун нууцлаг байдлаар эх орондоо ирсэн дуучин бүсгүй гэрээсээ гаралгүй гурван сар болсон гэдэг. Олны хэл амнаас эмээж, уран бүтээлээ үргэлжлүүлж чадахгүй хэсэг суусан нь тэр.

20.   “Удам”, “Тэнгэрийн ивээл” кинонд тоглосон С.Сэрчмаад иймэрхүү санал олон ирсэн ч татгалзсан гэдэг. Харин кино, жүжгийн дуугаар уран бүтээлээ үргэлжлүүлэх санаа төрж “Sally’s” продакшин байгуулсан төдийгүй бүр “Хүүхдийн элч дуучин” боллоо. Одоо тэр бяцхан охиныхоо төлөө амьдралын даваа нугачааг зоригтой туулах сэтгэлийн хаттай эмэгтэй. “Яг одоо танд юу хэрэгтэй байна вэ” гэсэн асуултад С.Сэрчмаа “Урам хайрлах сэтгэлийн үг” гэж хэлсэн нь ч уншигч танд нэгийг бодогдуулж байгаа биз ээ.

С.Цахиур