ШИНЭ АВАРГА Н.Төгсцогт: Монголын АРД ТҮМЭНДЭЭ баярлалаа

Монгол Улсын Гавьяат тамирчин, олимп, дэлхийн аваргын мөнгөн медальт Н.Төгсцогт өчигдөр /2019.01.27/ Мэргэжлийн боксын IBO холбооны аваргын бүсийн эзэн болсон билээ. Н.Төгсцогт Доминиканы боксчин Клаудио Маррейротой АНУ-ын Нью-Йорк хотын “Barclays Center”-т 12 үе тулалдаж, онооны илүүгээр ялалт байгуулсан.

Түүнийг дэмжихээр АНУ-д очсон олимпийн аварга Э.Бадар-Уугантай холбогдож, тулааны дараах сэтгэгдлийг сонслоо.

Э.БАДАР-УУГАН: УХААЛАГ, ТООЦООТОЙ ТОГЛОЛТ ХИЙЛЭЭ

-Их хүнд тулаан боллоо. Яг тоглолтын үеэр бэртэл авсан зүйл байхгүй. Баруун гар угаас бэртэлтэй байсан. Өнгөрсөн хугацаанд чамгүй сайн эмчлүүлсэн. Үүнээсээ  болгоомжилсон байж магадгүй. Жинг тавихдаа бага зэргийн алдаа гаргасан байх талтай санагдсан. Тоглолтын дараа толгой нь хүчтэй өвдлөө гэж ярьсан. Гэсэн ч энэ бүхнийг давж, гол нь их ухаалаг, тооцоотой тоглолт хийлээ.

Төгсөөгийн маань энэ удаагийн өрсөлдөгч нь түүнээс дутуугүй хүчтэй, ялангуяа баруун гарын ажиллагаа сайтай өрсөлдөгч байлаа. Бээжингийн олимпод манай жинд оролцож байсан. Надтай өрсөлдсөн Кубад ялагдсан санагдаж байна. Миний хувьд рингэнд ойрхон суудал таарлаа. Боломжоороо зөвлөсөн. Монголчууд маань маш олуулаа ирж, тэмцээн үзлээ. Бараг 500 орчим дэмжигч байсан байх аа. Монголчууд төдийгүй, “Barclays Center”-т цугласан олны дийлэнх нь манай Н.Төгсцогтыг маш их дэмждэг юм байна. Спортын том менежерүүд “Barclays Center” ойрд ингэж дүүрээгүй гэж ярьж байна. Н.Төгсцогт ийм олон дэмжигчтэй учраас түүний тоглолтод цаашид өндөр хэмжээнд анхаарал тавих ёстой юм байна гэдгийг ч мэргэжлийн холбоодын менежерүүд нь анзаарч, энэ талаар ярилцаж эхэлжээ. Монголчуудынхаа өмнөөс болон хувийн зүгээс маш их баяртай байна” гэлээ.

Үргэлжлүүлэн Гавьяат тамирчин Н.Төгсцогтын шийдвэрлэх тулааны дараах АНХНЫ СЭТГЭГДЛИЙГ хүргэе.

Н.ТӨГСЦОГТ: АНХ УДАА 12 РАУНД ТОГЛОЖ, ТОМ ТУРШЛАГА ХУРИМТЛУУЛЛАА

-Юуны өмнө монголчууддаа хандаж намайг бүгд чин сэтгэлээсээ дэмжсэнд талархаж байгаагаа илэрхийлье. Одоо сайхан тайвширч, хэвийн байдалдаа орж байна. Ордонд маш олон хүн ирсэн байсан. Энд тэндгүй Монголын төрийн далбаа маань байхыг харах үнэхээр сайхан байлаа.

Тоглолтын тактикын тухайд эхлээд жаахан дайрч, байдлыг ажигласан. Өрсөлдөгчийн хувьд хүчтэй цохилттой. Баруун талаараа савчих гээд эвгүй байсан. Тийм учраас тоглолтын дундаас хамаагүй болчимгүй үйлдэл, цохилт хийж болохгүй юм байна гэдгийг ойлгоод, хүчээ хуваарилж тоглохыг чухалд тавьсан. Миний өмнө нь бэртэж байсан баруун гарын цохилтын хүч жаахан сул байсан байж магадгүй.

Анх удаа 12 раундын турш тоглож үзлээ. Хаана хүчээ хуваарилах ёстойг мэдэж, том туршлага хуримтлууллаа.

Э.Бадар-Ууган ах, Монголын боксын холбооны ерөнхий нарийн бичгийн дарга Ц.Батнасан нар ирж дэмжлээ. Бадраа ах рингэнд маш ойр суусан болохоор тоглолтын турш зөвлөгөө өглөө. Яриа нь тод сонсогдож, бид хоёр тоглолтын турш холбогдож, ойлголцож чадсан. Үүнд их баяртай байна.

“Алтан Дорнод Монгол” компанийн Т.Ариунболд ахдаа баярлалаа. Монгол Улсын аварга Ч.Санжаадамба, улсын арслан Р.Пүрэвдагва, жүжигчин Э.Цолмонбаяр гээд олон сайхан ах нартаа, найзууддаа намайг дэмждэг бүх хүнд талархаж байна. Үнэхээр сайхан түшигтэй, айж бэргэх зүйлгүй болсон мэт санагдаж байсан.

Тулааны үеэр Т.Ариунболд ах санаачлан монголчуудын хүч шингэсэн хар тугийг “Barclays Center”-т заллаа. Чингис хаан тулаанд мордохдоо ялалтыг билэгшээд, их хар тугаа авч явдаг байсан гэдэг. Энэ утгаараа Тод манлай уяач Д.Даваахүү нарын Монголын олон арван эрдэм, ухаантай уяач нарын хурдан удмын 99 адууны дэл, сүүлээс дээжлэн энэхүү тугийг бүтээж, амилуулан авчирсан. Хүч, сэтгэл шингээсэн туг, сүлднийхээ өмнө ялалт байгуулсандаа баяртай байна.

Маш сайхан байна. Монголын ард түмэндээ их баярлалаа.