Д.Отгондалай: М.Энхжаргал дээр шүүгч нар сохорсон байсан байх

Английн Ливерпүүл хотноо Боксын ДАШТ үргэлжилсээр байна. Монголын 10 тамирчин зорьж очсоноос 5 нь медалийн төлөө тулалдахаар гарч ирсэн. Өнөө орой Дэлхийн аваргын мөнгөн медальт Л.Алтанцэцэг болон А.Баттулга нар тулаантай.

Энэхүү тулааны өмнө Олимп, Дэлхийн хүрэл медальт, Азийн наадмын аварга, Азийн аварга Д.Отгондалайгаас тэмцээн болон тамирчдын талаар бичил ярилцлага авлаа.

-ДАШТ-ий медалийн төлөөх тулаанууд болж байна. Манай тамирчдын бэлтгэл ямар байна гэж харав?

-Манай тамирчдын бэлтгэл маш сайн байгаа.

-Кубын дасгалжуулагчийг урьж ажиллуулж байгаа нь өгөөжтэй гэж бодож байна уу?

-Монгол хүүхэд залуус маань их авъяастай болохоор гадны дасгалжуулагч нартай гар нийлээд ажиллавал амжилт гаргахад улам дөхөм болно.

-Өнөө орой Л.Алтанцэцэг, А.Баттулга нар хүрэл медалийн төлөө тулаантай. Таны бодол юу байна?

Манай хоёр тамирчинд хоёуланд нь ялах боломж бий. Энэ боломжоо л тултал нь ашиглах хэрэгтэй. Хоёулаа медаль авна гэж итгэж байна. Л.Алтанцэцэгийн хувьд Дэлхийд финалдаад үзчихсэн, мэдрэмжтэй, хүчтэй боксчин. А.Баттулга бол төрөлхийн авъяастай, реакц их сайтай. Хоёулаа медаль руу орно гэж бодож байна.

-М.Энхжаргалын тулааны талаар куба дасгалжуулагч хэлэхдээ шүүгчийн асуудлыг хальт дурдах шиг болсон. Үүн дээр юу бодож байна?

-М.Энхжаргал бол тулчихсан сайн тамирчин. Тоглолтыг Унгар шүүгч л зөв харж, шүүлээ. Бусад шүүгч нарын нүд нь сохорсон байсан байх.

-Х.Билгүүнсайхан медалийн төлөө сайн л тулалдлаа. Гэвч эхний хоёр раунддаа оноогоор хоцроод, сүүлийнхэд илүүрхсэн ч ялагдчихлаа. Харамсалтай тулаан боллоо...?

Х.Билгүүнсайханы хувьд бол амжилт гаргах нь цаг хугацааны л асуудал. Лос-Анжелесийн олимпод гялалзаад байж байх болно.