Хамарын хийдийн хамгаалалтын хугацаа дөрөвдүгээр сард дуусна гэв

Дорноговь аймгийн нутаг, Хамарын хийд орчимд БНХАУ-ын компани олборлолт явуулахаар зэхээд байсныг аймгийн удирдлагууд үйл ажиллагааг нь зогсоож, газрыг тусгай хамгаалалтад авсан билээ. Харин Хамарын хийд орчмыг орон нутгийн тусгай хамгаалалтад 2014 онд авсан бөгөөд хамгаалалтын хугацаа ирэх дөрөвдүгээр сард дуусна хэмээн эх сурвалж хэллээ. Тэгэхээр лицензийг цуцлуулах тал дээр анхаарахгүй бол ирэх дөрөвдүгээр сард Хятадын компани олборлолт явуулахад бэлэн гэдгийг ч нуусангүй.

Энэ тухайд эргэн сануулахад, одоогоос 12 жилийн тэртээ буюу 2007 оны наймдугаар сарын 03-нд “АОЛК” ХК Хамарын хийд орчимд нүүрсний хайгуул явуулах тусгай зөвшөөрөл,  2007 оны арваннэгдүгээр сарын 08-нд ашиглалтын тусгай зөвшөөрлийг тус тус авч байсан. Гэтэл “АОЛК” ХК тусгай зөвшөөрлөө Хятадын хөрөнгө оруулалттай “Оуяашиёоу”ХХК-д шилжүүлсэн байдаг. Мөн дээрх компани тусгай  зөвшөөрлөө хоёр хувааж 16301,21 га талбайг “Даблью Эс Жи Эл” ХХК-д 2018.06.13-нд, 8921,23 га талбайг “Олон ихт баян” ХХК-д  2018.11.22-нд тус тус шилжүүлсэн байна. Анх авсан тусгай зөвшөөрлөө өөр компанид, нөгөөх нь бас дахин шилжүүлдэг нь далдуур лицензийн наймаа явагддаг байхыг үгүйсгэх аргагүй гэх. Дорноговь аймгийн Сайншанд, Өргөн, Эрдэнэ сумын нутагт анх АОЛК” ХК хайгуулын тусгай зөвшөөрөл авч байсан бол эдүгээ лицензийг хоёроос гурван компанид дамжуулан шилжүүлж байжээ.

Хамарын хийдийн орчим нүүрснээс гадна элдэв төрлийн ховор элементтэй тухай дээхнэ үеийн хуучцуулын яриа ам дамжиж иржээ. Халуу  төөнөсөн зуны цагаар нүүрс буй хэсгээр их халж дээгүүр нь давхисан морьтой хүн бүдэрч унадаг байсан тухай яриа ч байдаг. Ямартай ч тусгай зөвшөөрөл хүчинтэй байгаа тул компани дахин ирж үйл ажиллагаа явуулахад бэлэн байгаа. Одоохондоо тусгай зөвшөөрөл хүчинтэй байгаа тул ч хэзээ ч ирж үйл ажиллагаа явуулахад бэлэн байгаа  гэдгийг санах хэрэгтэй.