"Бидний цөөхөн монголчууд" төсөл ТЕЛЕВИЗ болж өргөжлөө

Нүүдэлчин маягийн уламжлал нүдэн дээр алга болоод байгаа юм шиг санагддаг. Бид маш хурдацтай хотжиж, суурин амьдралд орсноор өдөр тутмын хэрэгдээнд байсан монгол зүйлс, уламжлал, харилцаа гээд бүгд улам л бүдгэрээд байна. Тиймээс монголоо авч үлдэхийн тулд "Бидний цөөхөн монголчууд" төслийг эхлүүлсэн... гэж Зам тээврийн сайд асан М.Зоригт хэвлэлд өгсөн нэгэн ярилцлагадаа онцолжээ. Тэрбээр одоогоос хоёр жилийн өмнө "Бидний цөөхөн монголчууд" төслөө Хөвсгөл аймгаас эхлүүлж, хүний амьдралын торгон агшин, тэрхэн мөчийг зураг болон дүрсэнд мөнхөлж үлдээх их аяндаа мордсон байдаг.

Өнгөрсөн хоёр жилийн хугацаанд төсөл амжилттай хэрэгжиж, одоо ч үргэлжилж байна. Энэхүү төслийн гол зорилго нь нүүдэлчин монголын эгэл амьдралыг зурагт буулгаж, хойч үедээ үнэт өв болгон үлдээх юм. Ингэхдээ 21 аймгийн 400 гаруй сум, сууринд хүрч ажиллахаар төлөвлөжээ. Энэхүү "Бидний цөөхөн монголчууд" төсөл цаашид дор хаяж 10 жил үргэлжлэх бөгөөд төслийн багийнхан өнгөрсөн хоёр жилийн хугацаанд Хөвсгөл, Увс, Өмнөговь, Ховд зэрэг долоон аймаг, таван улсад ажиллажээ.  Жилийн дөрвөн улиралд гэртээ ч амрах завгүй ажилласан гэдгээ төслийн багийнхан ӨНӨӨДӨР онцолж байна. 

"БИДНИЙ ЦӨӨХӨН МОНГОЛЧУУД" ТЕЛЕВИЗ НЭЭЛТЭЭ ХИЙЛЭЭ

Тэгвэл "Мөнхчулуун" сангаас санаачлан хэрэгжүүлж байгаа энэхүү "Бидний цөөхөн монголчууд" төсөл хүрээгээ тэлж телевизтэй боллоо. Төслийн багийнхан өнгөрсөн баасан гарагт /2019.02.15/ телевизийнхээ нээлтийг хийж, шанг нь татлаа. Шинэхэн телевизийн шанг татан ёслолын үйл ажиллагаанд "Бидний цөөхөн монголчууд" төслийн багийнханаас гадна Ерөнхий сайд асан Ч.Сайханбилэг, нийлэлч Баабар нар хүрэлцэн ирсэн юм.

Д.НЯМДОРЖ: МОНГОЛЧУУДЫН АМЬДРАЛЫГ ГЭРЭЛ ЗУРГААР ТҮҮХ БОЛГОН ҮЛДЭЭНЭ 

Энэхүү төслийн талаар "Бидний цөөхөн монголчууд" төслийн ахлагч Д.Нямдорж хэлэхдээ "Монголчууд яаж амьдардаг, яаж аж төрдөг вэ гэдгийг түүх, архив болж үлдээнэ. Ингэхдээ бичих биш гэрэл зураг, дүрс хэлбэрээр түүх болгон үлдээхээр зорьж ажиллаж эхэлсэн. Хамгийн анхны ажил маань 2017 оны гуравдугаар сард хоймор нутаг болох Хөвсгөл аймгаас эхлүүлсэн" хэмээлээ.

ДЭЛГЭРЭНГҮЙГ ВИДЕО ХЭСГЭЭС ҮЗНЭ ҮҮ!

Ч.САЙХАНБИЛЭГ: ЭНЭ БОЛ БАГИЙН АЖИЛ, ОЛОН ХҮНИЙ ХҮЧ ХӨДӨЛМӨР

Энэ үеэр "Бидний цөөхөн монголчууд" төслийг санаачлагчдын нэг, Ерөнхий сайд асан Ч.Сайханбилэг "Биднийг энд цуглуулсан М.Зоригтдоо баярлалаа. Хоёр, гурван сараар гэрээ мартсан гэсэр шиг явж өнгөрсөн хоёр жилийн хугацаанд долоон аймаг, таван улсад ажиллаад ирсэн. Зарим хүн гайхаж байж магадгүй. Намайг гэнэт гараад үг хэлээд унахаар. Өнгөрсөн оны есдүгээр сард М.Зоригт бид хоёр уулзаж, төслийг яаж үргэлжлүүлэх үү, ямар утга санаагаар баяжуулахаа ярилцсан. Хамтарч ажиллахаар болсон юм. Тэрхүү ярианы маань үр дүн эхнээсээ гарч байна. Энэ ажил бол багийн ажил, маш олон хүний хүч хөдөлмөр" хэмээн онцоллоо.

ДЭЛГЭРЭНГҮЙГ ВИДЕО ХЭСГЭЭС ҮЗНЭ ҮҮ!     

НИЙТЛЭЛЧ БААБАР: БИД УЛСЫНХАА ТҮҮХ, ӨНӨӨГИЙН БАЙДЛАА МЭДДЭГ ЭСЭХ НЬ ЭРГЭЛЗЭЭТЭЙ 

Өнгөрсөн баасан гарагт болсон "Бидний цөөхөн монголчууд" телевизийн нээлтийн үеэр бас номын нээлт болсон юм. Харин номын нээлтийн талаар нийтлэлч Баабар хэлэхдээ "Бид Монгол ялна гэж ярьдаг. Дотроо алалцаад л байна. Яг аль нь ялах гээд байгаа юм бүү мэд. Харин бид энэхүү төслийг бол ялна гэж боддог шүү. Энгийн хүмүүсийн тухай, Монгол орны байгалийн тухай хийгээд явж байна. Үнэндээ бид улс, орныхоо түүх өнөөгийн байдлыг мэддэг эсэх нь эргэлзээтэй. Энэ төслийг дагаад явах юм бол Монгол ялж магадгүй л юм" хэмээн ярилаа.

ДЭЛГЭРЭНГҮЙГ ВИДЕО ХЭСГЭЭС ҮЗНЭ ҮҮ!

Ж.ОТГОНБАЯР: ДЭЛХИЙД МОНГОЛЫГ СУРТАЛЧИЛДАГ ТЕЛЕВИЗ БАЙДАГГҮЙ

Тэгвэл "Эх орон", "Парламент", "Бидний цөөхөн монголчууд" телевизийн гүйцэтгэх захирал Ж.Отгонбаяр "Хоёр жилийн өмнө "Мөнхчулуун" сангийн тэргүүн М.Зоригтын эхлүүлсэн энэхүү төслийг хараад анх багт нь орж ажиллахыг хүсч байсан. Харин цаг хугацааны явцад ямар ч байсан энэхүү төсөлтэй хамтарч ажиллаж байна. Монголд олон телевиз бий. Гэхдээ монголыг дэлхийд сурталчилдаг нь байхгүй. Тиймээс өнөөдрийн энэхүү төсөлд хамтарч ажиллаж байгаадаа баяртай байна" хэмээн ярилаа. 

ДЭЛГЭРЭНГҮЙГ ВИДЕО ХЭСГЭЭС ҮЗНЭ ҮҮ!