Тэрүнофүжи маргааш барилдана

Мэргэжлийн сүмогийн озэки асан манай бөх Тэрүнофүжи энэ Хаврын тэмцээнээс дохёндоо эргэн ирж байгаа билээ. Хүнд гэмтэл бэртэл, өнгөрсөн зургадугаар сард хийлгэсэн мэс заслын улмаас барилдалгүй бараг жил болж байгаа Тэрүнофүжи маргааш /2019.03.10/ Хаврын тэмцээний эхний өдөр барилдана.

Гэхдээ түүнийг эргэн ирлээ гээд баярлахад эрт байгаа бололтой. Таван башё өнжиж, жонидан зиндааны 48 хүртэл чансаагаар унаад байгаа шавийнхаа талаар Исэгахама ояката “Гэмтэл бүрэн эдгээгүй байгаа. Өвдөгний бэртэл хэцүү, бүрэн эдгэхэд цаг их шаарддаг. Гэхдээ барилдана. Ямар ч гэсэн барилдаж үзэхгүй бол болохгүй байна. Банцүкэгээ жонокүчи хүртэл буулгаж таарахгүй. Жониданд бол хөлөө ашиглахгүй давчих байх гэж бодоод байгаа. Ер нь барилдахгүй, байнга өнжөөд байж болохгүй шүү дээ” гэж сэтгүүлчдэд ярьжээ. Шавиа ялна гэж итгэж байгаа ч “Өнөөдөр санданмэ зиндааны бөхчүүдтэй бэлтгэл дээр барилдаж байгааг нь харахад тун хэцүүхэн байна лээ” гэж бас нэг санаа зовоосон мэдээ хэллээ.
 

Тэрүнофүжи өнгөрсөн 6-р сард хагалгаанд орсноос гадна чихрийн шижин өвчин гэсэн бас нэг “дайсантай” тэмцэж байгаа. 2018 оны Зуны тэмцээнээс хойш барилдаагүй. Хамгийн сүүлд 50 хувийн амжилт үзүүлсэн нь 2017 оны тавдугаар сар. Озэки цолтой 12 давж байв. Түүнээс хойш 10 башё 50 хувийн амжилт үзүүлээгүйгээс 9-д нь өнжсөн. Озэки цолтой байсан бөх макүшитагаас доош зиндаанд барилдаж байсан түүх байхгүй. Хөл бүрэн эдгэлээ гэхэд барилдааны мэдрэмж гэж нэг чухал зүйл бий билээ.

Ийнхүү Тэрүнофүжигийн хувьд дахин цолтой бөх болох маш хүнд хэцүү аян эхэллээ.

Монгол нутгийнх нь хөх тэнгэр түүнийг ивээх болтугай.