Жүдо: Азербайжанд монгол легионеруудыг сул гэж шүүмжлэв

Азербайжан улсын “Azerisport.com” цахим сэтгүүлд “Тасралтгүй авах легионер жүдочид” нэртэй нийтлэл гарчээ. Ингээд элдэв тайлбаргүй орчуулан хүргэе.

Тасралтгүй авах легионер жүдочид

Азербайжаны жүдогийн шигшээ баг хөгжөөн дэмжигчдээ огт уйдаахгүй байна. Байж байгаад л гадаад жүдоч аваад ирдэг болжээ. Өнөөдөр эхлэж байгаа Тбилисийн Гран При тэмцээн ч ялгаа байхгүй. Туркийн Рукийе Озердем (70 кг) манай шигшээ багийн нэр дээр барилдана.

Олон жилийн турш манай жүдо бөх гадаад легионергүй амжилттай хөгжөөд ирсэн. Харин яагаад ч юм сүүлийн жилүүдэд иргэншлээ сольсон гадаад жүдочдоор шигшээ баг дүүрлээ. Тэднээс хоёрхон бөх л сайн барилдаж, легионерийн үүргээ бүрэн гүйцэтгэж байна. Украинаас ирсэн  Ирина Киндзерская (+78 кг) Их Дуулга, Гран При тэмцээнүүдэд тогтмол медаль хүртэж байгаа бол гүрж залуу Ушанги Кокаури (+100 кг) дэлхийн аваргаас мөнгөн медаль хүртсэн. Тэд Азербайжанд сайн бөх байхгүй хүнд жинд барилддагийг онцлох хэрэгтэй.

Харин бусад гадаад бөхчүүдийн талаар хэлэх юм юу ч алга. Тамирчны тухай ярихдаа амжилтыг нь хардаг. Харин Монголоос ирсэн хэдэн жүдоч бүсгүйчүүдэд харуулчихаар амжилт байхгүй хэвээр. Тэд нэлээд хэдэн жил манай улсын өмнөөс барилдаж, тогтмол тэмцээн уралдаанд оролцож байна. Тбилисийн Гран Прид ч М.Ичинхорлоо барилдах болно.

Азербайжаны жүдо бөхийн холбооноос 52 кг-ийн жинг сайжруулахаар шийдэн, Румынаас Александра-Лариса Флорианыг урьсан. Харамсалтай нь Лариса ч амжилт гаргахгүй байна. Европын Цомд 5-р байрт орсон бол Марракеш Гран Прид хоёрдугаар тойрогтоо л ялагдсан. Энэ жинд Монголоос ирсэн П.Буянхишиг гээд легионер байгаа гэдгийг хэлэх хэрэгтэй. Гэхдээ П.Буянхишиг маш муу барилдсаар дэлхийн чансаа нь 113-т буусан байна. Тэр бусад монголчуудынхаа адил “шуудайн доторх муур” гэдэг шиг л тамирчин байж таарсан.

Турк бүсгүй Рукийе Озердемын (70 кг) талаар онц хэлэх зүйл байхгүй. Учир нь тэр хамгийн сүүлд олон улсын тэмцээнд оролцсон нь 3 жилийн өмнө. Энэ жил 23 настай тэрбээр 3 жилийн өмнө Европын залуучуудын цомын тэмцээнд хүрэл медаль хүртэж байлаа. Насанд хүрэгчдэд ямар амжилт үзүүлэхийг нь тааварлахын аргагүй.

“Тбилиси Гран При”-д мөн орос залуу Алиумар Тумаев (90 кг) манай шигшээ багийн өмнөөс барилдана. Тумаев энэ сарын эхээр Европын Цомын тэмцээнд Азербайжаны төлөө анхны тэмцээндээ орсон. Олон улсын тэмцээнд 4 жилийн өмнө л орж байсан тамирчин. Өнгөрсөн оны УАШТ-д хүрэл медаль хүртсэн бөгөөд анх удаа Гран Прид барилдах гэж байна. 90 кг-ийн жинд Мамедали Мехтиев, Турал Сафгулиев гээд сайн бөхчүүд байхад яагаад гадаадаас бөх авав гэж асуумаар байна.