Л.Эрдэнэчулуун: Хүний аминаас үнэтэй лиценз гэж байхгүй

Налайх дүүрэгт нүүрс олборлолтын үйл ажиллагаа явуулдаг “Сүмбэр худаг” ХХК-ийн тусгай зөвшөөрлийг цуцлахаар болсон талаар Нийслэлийн мэргэжлийн хяналтын газраас мэдээллээ.

НМХГ-ын улсын байцаагч нар өнгөрсөн сарын сүүлээр Налайх дүүрэгт нүүрс олборлох тусгай зөвшөөрөл бүхий 22 ААН-ийг шалгасан. Үүнээс “Сүмбэр худаг” ХХК нь нөхөрлөл байгуулж ажиллахдаа, ажилчидтайгаа хөдөлмөрийн аюулгүй байдлын гэрээ байгуулаагүй зөрчил илэрчээ. Иймд тус нөхөрлөлийг байгуулсан “Сүмбэр худаг” ХХК-ийн тусгай зөвшөөрлийг цуцлах саналаа Ашигт малтмал, газрын тосны газарт хүргүүлэхээр болжээ. Энэ талаар НМХГ-ын дарга Л.Эрдэнэчулуун  “Хүний амь наснаас үнэтэй лиценз гэж байхгүй. Хөдөлмөрийн аюулгүй байдлыг хангаагүй уурхайн лицензийг цуцлах хэрэгтэй. Хууль бус үйл ажиллагаа явуулчихаад олон хүн ажилгүй боллоо гэж ярих шаардлагагүй. Нөхөрлөлийн гэрээндээ, хөдөлмөрийн аюулгүй байдлыг хангах заалтыг тусгасан байх ёстой” гэлээ.

Налайх дүүрэгт сүүлийн 10 жилд нүүрсний уурхайн 137 ослоос 274 хүнийг аварсан бол, 126 хүн амиа алджээ. Тус дүүрэгт өнөөдрийн байдлаар, “Сүмбэр худаг” ХХК, "Таван шүтээн" ХХК, "Хэлтрэгэ" ХХК зэрэг компанийн талбайд есөн нөхөрлөлийн 83 бичил уурхайд 590 иргэн нүүрс олборлож байна.