Ичиножёо: Эзэн хааны цом өргөх зорилготой

Архангай аймгийн уугуул, Минато дэвжээний суугуул Алтанхуягийн Ичинноров хэмээх Ичиножёо Такаши энэ сарын 7-нд 26 нас хүрлээ.

Уламжлал ёсоор сүмо бөхчүүд, спортын сэтгүүлчид баярын эзэнд төрсөн өдрийн бялуу бэлэглэсэн байна.  

Өнгөрсөн тэмцээнд 14 давж, их аварга Хакүхотой өрсөлдсөн Ичиножёо “эргэн ирж, сэргэн мандаж” байгаагаа зарласан билээ. 21 настайдаа 2014 оны Кюүшюү башёд дээд зиндаанд анх барилдахдаа 13 давж, кинбоши, гарамгай, дайчин барилдааны тусгай шагнал авч, озэки, ёкозүна болох нь цаг хугацааны асуудал гэгдэж байлаа. “Монголын үлэмж биет”, “Ирээдүйн арслан, аварга” гэж нэрлүүлэн, бөх сонирхогчид, шинжээчдийг шуугиулсан тэр цагаас хойш 5 жил өнгөрчээ. Ичиножёо озэки, ёкозүна болсонгүй. Санякүд ч тогтмол барилдахгүй, банцүкэ нь дээш доошоо явж байтал 26 нас хүрлээ. Ахмад бөх биш ч залуу бөх бас биш болжээ.   

Ичиножёо ч үүнийгээ сайн ойлгож байна. Төрсөн өдрийн баяраараа сэтгүүлчдэд “Нэг мэдсэн чинь 26 нас хүрчихлээ. Дээд зиндаанд надаас залуу олон бөх гарч ирлээ. Зарим нь түрүүлээд цол авчихлаа. Саяхан л би шинэ залуу бөх гэгдэж байсан бол одоо 26 настай болжээ. Одоогийн зорилго Эзэн хааны цом хүртэх. Амархан зүйл биш ч саяын тэмцээнд 14 ялж, итгэл нэмэгдлээ. Түрүүлэх хүсэлтэй байна” гэж ярьсан байна.