Их аварга Хакүхогийн иргэншлийн талаар Японы хэвлэлүүд юу мэдээлэв?

Мэргэжлийн сүмо бөхийн их аварга Хакүхо М.Даваажаргал Монгол Улсын Ерөнхийлөгчийн Тамгын газарт иргэншлээ солих асуудлаар  албан ёсны хүсэлтээ илгээсэн гэх мэдээлэл өчигдөр манай зарим хэвлэлээр гарсан билээ. Удалгүй Японы орны хэвлэлүүд ч мэдээллэж эхэлсэн.

Энэ талаар ЕТГ-ын Хэвлэл мэдээллийн албанаас тодруулахад “Одоогоор Хакүхо М.Даваажаргал иргэншлээ солих асуудлаар манайд хандаагүй байна. Энэ асуудлаар эхлээд Гадаадын иргэн, харьяатын газарт хандах ёстой. Түүний дараа ГИХГ-аас манайд материалыг нь ирүүлдэг журамтай. ГИХГ-аас Хакүхо М.Даваажаргалтай холбоотой материал ирүүлээгүй” гэлээ.

Харин ГИХГ-аас "М.Даваажаргал Монгол Улсын харьяатаас гарах хүсэлт манайд гаргаагүй байна. Хэрэв хүсэлтээ өгсөн бол Япон улсад суугаа Монгол Улсын ЭСЯ-аар дамжиж ирнэ" гэсэн хариу өгөв.

Япон улс дахь Монгол Улсын Элчин сайдын яамнаас энэ талаар лавлахад "Тийм хүсэлт манайд ирээгүй" гэж хариуллаа.

Ингээд Японы хэвлэлээр их аваргын талаар ямар мэдээлэл гарч байгааг хүргэе.

“Санкэй шимбүн”

Ёкозүна Хакүхо Японы иргэншил авахын тулд Монголын иргэншлээс гарахаар хүсэлт гаргасан нь энэ сарын 17-нд тодорхой боллоо. Өчигдөр Токио хотын Оота дүүрэгт болсон тойргийн барилдааны дараа Хакүхо сэтгүүлчдэд “Одоогийн байдлаар ямар нэг зүйл хэлэхэд эрт байна. Хоёр улсын зүйл ч байна. Ер нь бол үр дүнг хүлээх л үлдсэн” гэж хэллээ. Гадаадын бөхчүүд зодог тайлаад Сүмогийн холбоонд үлдэхэд Японы иргэншил авах шаардлагатай. Хакүхо ояката болохын тулд иргэншлээ сольж байгаа бололтой. Хакүхо өнгөрсөн гуравдугаар сард сүмогийн түүхэн амжилт болох 42 дахь түрүүгээ авсан. Нэг хэсэг ганцаараа ёкозна цолтой барилдаж, сүмогийн ертөнцийг авч явсан хүний хувьд гарын шавиа бэлтгэх хүсэл нь урьд өмнөхөөс илүү болжээ. Монголын анхны ояката Кёкүтэнхогийн хэлснээр Японы иргэншил авахад хагас жил хэртэй зарцуулдаг гэнэ.

“Майничи шимбүн”

Мэргэжлийн сүмогийн ёкозүна Хакүхо М.Даваажаргал Монголын иргэншлээс татгалзах хүсэлтээ Монголын Засгийн газарт гаргажээ. Ояката болохын тулд авсан арга хэмжээ гэж шинжээчид үзэж байна. Сүмо бөхийн холбооны дүрмэнд зодог тайлаад ояката болохын тулд Японы иргэн байх ёстой гэсэн дүрэм бий. Мөн барилдаж байхдаа ёкозүна, озэки цол хүртсэн байх, санякүд 1 башё, дээд зиндаанд 20 башё, жюүрёо, дээд зиндаанд нийт 30 башё барилдсан байх шаардлага тавьдаг билээ. Харин ёкозүна цолтон зодог тайлаад барилдаж байсан үеийнхээ дэвжээний нэрээр холбоонд 5 жил ажиллах эрхтэй. Хэрэв Хакүхо иргэншлээ солих юм бол энэ бүх шаардлагыг бүрэн хангаж байгаа юм. Хакүхо “Миягино” дэвжээндээ шинэ бөх урих ажлыг гардаж хийж, хувийн хэд хэдэн шавьтай болоод байгаа билээ. Миягино ояката 2022 онд тэтгэвэртээ гарах бөгөөд дэвжээг нь Хакүхо өвлөн авч болох юм. Гэхдээ 42 түрүүлсэн их аваргын хувьд Хакүхо өөрийн нэрээр ч дэвжээ нээх эрхтэй. Гадаад бөхчүүдээс одоо дэвжээ удирдаж байгаа ояката 3 бий. Хавайн арлын ёкозүна Мүсашимарү, Болгарын озэки Котоошюү, Монголын сэкивакэ Кёкүтэнхо нар. Гэхдээ 42 түрүүлсэн их аварга Хакүхо зодог тайлаад холбоонд үлдэх юм бол сүмогийн хөгжилд үнэтэй хувь нэмэр оруулах нь гарцаагүй.

Кёкүтэнхо Томозүна ояката “Ояката Хакүхо ямар шавьтай болж, хэдэн цолтой бөх төрүүлэх бол гэдэг их сонирхол татаж байна. Бүх амьдралаа сүмод зориулсан түүний дэвжээ нээж, шавьтай болох гэсэн хүслийг нь сайн ойлгож байна”

Японы сонирхогчдын сүмогийн холбооны захирал Хирахара “Сонирхогч, мэргэжлийн сүмо аль алинд нь сайн зүйл байна”

Манга зураач Якүмицүрү “Байгуулсан гавьяагаа үнэлүүлэн, Монголын иргэн хэвээрээ ояката болох гэж Хакүхо их оролдсон. Тэрийгээ больсон гэж харж байна. Хэрэв Хакүхо ояката болбол Сүмо бөхийн холбооноос түүнд сайн зааж, сургаж байх шаардлагатай”

Сүмогийн холбооны хэвлэлийн албаны дарга Шибатаяма “Хувь хүний асуудал тул холбоонд ямар ч хамаагүй”

“KYODO” агентлаг

Японы иргэн болохын тулд Монголын харьяаллаас гарахаар шийдсэн их аварга Хакүхо тойргийн барилдааны дараа сэтгүүлчдэд “Ямар нэг зүйл хэлэхэд эрт байна” гэж ярьсан ч сүмо бөхийн их аваргын дараагийн үйлдэл олны анхаарлын төвд байсаар байх бололтой. Монгол бөхчүүдээс Японы иргэншил авсан сүмоч Кёкүтэнхо хэмээх Томозүна ояката зэрэг хэд хэд байгаа ч озэки, ёкозүна цолтой барилдаж байсан бөх байхгүй билээ.

“Никкан Спортс”

Ёкозүна Хакүхо иргэншлээ солих болсон талаар энэ сарын 17-ноос эхлэн мэдээллэж эхэллээ. Хакүхо эртнээс зодог тайлаад ояката болох хүсэлтэй гэдгээ хэлдэг байсан. Монголын хэвлэл мэдээлэлд Хакүхо өнгөрсөн долоо хоногт албан ёсоор хүсэлт гаргасан гэж мэдээлсэн байна. Их аварга ч энэ талаар үгүйсгэсэнгүй. Ояката Хакүхо төрөн гарах цаг ойртжээ. Байгуулсан гавьяа, үзүүлсэн амжилтаараа тэр яалт ч байхгүй өөрийн нэрээр дэвжээ нээх эрхтэй. Монгол бөхчүүдээс Японы иргэншил авсан бөх олон ч аварга, арслан цолтон үгүй. Харин Америкийн Акэбоно, Мүсашимарү гэсэн хоёр аварга Японы иргэн болсон.

“Споничи”

“Ёкозүна Хакүхо иргэншлээ солих хүсэлт гаргажээ” гэсэн мэдээлэл Монголын хэвлэлээр гарсан билээ. Хакүхо энэ талаар “Ийм хурдан мэдээлэл гарсанд гайхаж байна. Одоохондоо хэлэх зүйл байхгүй” гэж тайлбарласан. Японы иргэн болж, ояката болсон гадаадын сүмоч ес байдаг. Дөрөв нь монгол. Монголын анхны ояката Кёкүтэнхо “Би хагас жил зарцуулж байж, иргэншлээ сольсон. Тэгэхээр энэ жилдээ багтаад Хакүхо Японы иргэн болж магадгүй” гэж ярьлаа.

“Спортс хочи”

Энэ жилдээ багтан, их аварга Хакүхо Японы иргэн болох шинжтэй. Ингэхээр бид ирэх жилийн Токиогийн олимпод Япон ёкозүнатай болох нь. Хакүхо өөрөө энэ талаар дэлгэрэнгүй тайлбар хийгээгүй ч “Одоохондоо тайлбар хийхэд эрт байна” гэж хэлсэн. Хаврын тэмцээний түрүү бөхийн ярилцлагад үзэгчдийг уухайлуулан шүүмжлэл хүртсэн ч гадаад, дотоодын хүүхдүүдийн дунд зохиодог “Хакүхо Цом” тэмцээн нь сүмогийн ертөнцөд өндөр үнэлэгддэг билээ.

“Санспо спорт”

Хакүхо Японы иргэн болсноор сүмо сонирхогчид “Хакүхо” дэвжээг удахгүй харах боллоо. Барилдаж байх үедээ их аварга байсан нь дэвжээ удирдах ояката болоход хамаа байхгүй. Тиймээс Хакүхог шинэ сайн бөхчүүд гаргах, дэвжээгээ удирдах их ажил хүлээж байна. Дээд зиндааны Үра, Аби гэсэн Миягино дэвжээний бөхчүүд түүний гарын шавь юм.