ААШТ: Ө.Батзул Реза Язданитай алтан медалийн төлөө барилдана

2019 оны 04 сарын 23

Бөхийн төрлүүдийн 2019 оны насанд хүрэгчдийн Азийн АШТ өнөөдөр /2019.04.23/ БНХАУ-ын Си Ань хотын Электрон, шинжлэх ухааны их сургуулийн спорт цогцолборт эхэллээ. Тэмцээний эхний өдөр чөлөөт бөхийн эрэгтэйчүүдийн 57, 65, 70, 79, 97 кг-ийн жингийн барилдаан явагдсан.
 

Эхний өдөр манай улсаас 5 бөх барилдаж, 4 нь тэмцээнээ дуусгалаа. 97 кг-ын жинд барилдсан “Аврагч” спорт хорооны тамирчин ОУХМ Өлзийсайханы Батзул л шигшээд шалгарсан. Орой 18 цагаас тэр дэлхийн хошой аварга, Азийн наадмын 3 удаагийн аварга Реза Язданитай аваргын алтан медалийн төлөө барилдана.

57 кг-ийн жинд Залуучуудын ДАШТ-ий хүрэл, Азийн АШТ-ий алтан медальт, ОУХМ Н.Насанбуян эхний барилдаандаа 2018 оны Азийн АШТ-ий мөнгө, залуучуудын ДАШТ-ий мөнгө, хүрэл медальт Узбекистаны Махмужон Шавкатовт 2:7-гоор ялагдлаа.  

65 кг-д 23 хүртэлх насны Азийн аварга, ОУХМ Тулга Японы Коки Шимизүд 4:4-өөр ялагдсан.  

70 кг-ийн жинд Залуучуудын ДАШТ-ий хүрэл медальт, 23 хүртэлх насны Азийн аварга ОУХМ Э.Тэмүүлэн 1/8 шигшээд “Рио-2016” олимпийн наадмын хүрэл, “Лас-Вегас-2015” ДАШТ-ий мөнгөн медальт Узбекистаны Ихтиор Наврузовыг оноогоор цэвэр (10:0) ялсан ч шөвгийн наймд Ираны Йонес Эмамичогайд 2:12-оор ялагдав. Ираны бөх хагас шигшээд Казахстаны Нуркойза Кайпановт дийлджээ.

79 кг-д “Монголиа Опен” ОУТ-ий мөнгөн медальт Д.Төгс-Эрдэнэ Энэтхэгийн Парвеен Ранад 2:6 харьцаатай ялагдсан. Түүний өрсөлдөгч нь Япон, Казахстаны бөхчүүдийг ялж шигшээд шалгарснаар Д.Төгс-Эрдэнэд дагах барилдаан гарсан. Дагах барилдаанд тэр Японы Юта Абэд 2:12-оор ялагдлаа.

97 кг-д “Монголиа Опен” ОУТ-ий алт, мөнгө, хүрэл медальт, ОУХМ Ө.Батзул 1/4 шигшээд Энэтхэгийн Сативарт Кадианыг 7:2-оор, хагас шигшээд эзэн орны Гао Хаобинийг 10:0-ээр тус тус яллаа. Ингэснээр тэрбээр алтан медалийн төлөөх барилдаанд Ираны алдарт бөх Реза Язданитай алтан медалийн төлөө барилдах боллоо гэж Монголын чөлөөт бөхийн холбооноос мэдээллээ.

Сэтгэгдэл ( 3 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Төр(202.9.44.96) 2019 оны 04 сарын 23

Ойлгомжгүй байна. Ази тивийн аварга шалгаруулах тэмцээн юм уу эсвэл Ази номхон далайн орнуудын бүсийн тэмцээн юм уу

0  |  0
zochin(66.181.161.64) 2019 оны 04 сарын 23

Ene shigshe bagiin bagsh nar yu hj baidag bnaa .

0  |  0
zochin(66.181.161.64) 2019 оны 04 сарын 23

battulga gj 1 mal bna

0  |  0
Top