Нүүрс нийлүүлэх тендерийг будилаантуулжээ  

Улаанбаатар хотын Захирагчийн ажлын албаны харьяа “Хэсэгчилсэн инженерийн хангамжийн удирдах газар” ОНӨААТҮГ-аас 2019.1, 2019.2 дугаартай Халаалтын зуухнуудын түүхий эд нүүрс нийлүүлэх битүүмжилсэн тендерийг 2019.4.22-нд шалгаруулахаар зарласан. Гэсэн ч “Нээлттэй бус” гэдэг гомдлын хүрээнд ШӨХТГ-аас уг тендерийг түр хойшлуулсан юм.

Тендерт оролцох хүсэлтэй компаниудын зүгээс энэ сарын 6-ны өдөр “Хэсэгчилсэн инженерийн хангамжийн удирдах газар”-ын хуулийн зөвлөх Б.Эрдэнээтэй гар утсаар болон биечлэн очиж уулзан, тендерийн баримт бичгийг худалдан авах, дараагийн шалгаруулалт хэзээ явагдах талаар тодруулахад “ШӨХТГ-аас хариу ирүүлээгүй. Баримт бичгийн гаргаж өгөх боломжгүй. Дараагийн шалгаруулалт хэзээ болохыг мэдэхгүй” хэмээн хоёр ч удаа мэдээлэл өгөхөөс татгалзсан аж. 

Гэтэл тавдугаар сарын 7-ны өдөр 11 цагт шалгаруулалт хэзээ болохыг мэдэхгүй гэж байсан Б.Эрдэнээ тендерийн бичиг баримт хүлээн авах хугацааг хааж, 12 цагт шууд шалгаруулалт явуулсан нь анхаарал татаж байгаа юм. Ноцтой нь өөр компанид тендерийн материал өгөөгүй хэрнээ ХИХУГ-ын тендерт байнга ялдаг гэж яригдаж буй н.Мэндбаяр захиралтай нэр бүхий компанийг дахин шалгаруулсан гэнэ.

Ингэснээр “Төрийн болон орон нутгийн өмчийн хөрөнгөөр бараа, ажил үйлчилгээ худалдан авах тухай” хуулийн 6.1-д заасан “Худалдан авах ажиллагаанд ил тод, өрсөлдөх тэгш боломжтой, үр ашигтай, хэмнэлттэй, хариуцлагатай байх зарчмыг баримтална” гэдэг заалтыг илт зөрчсөн гэж үзэн “Багануур илч” компанийн зүгээс гомдол гаргажээ.

Түүнчлэн 7.1.1-д нээлттэй тендер шалгаруулалтын журам, 17.1-д нээлттэй тендер шалгаруулалтын урилгыг энэ хуулийн 21 дүгээр зүйлд заасны дагуу зарлан мэдээлж, сонирхогч этгээдийг тендерт оролцох тэгш боломжоор хангана, 21.2-т “Захиалагч тендер шалгаруулалтын тухай дэлгэрэнгүй мэдээллийг ил тод, нээлттэй зарлах бөгөөд сонирхсон этгээдэд саадгүй олгоно” зэрэг заалтуудыг зөрчсөн гэж үзсэн байна. Тиймээс “Хэсэгчилсэн инженерийн хангамжийн удирдах газар”-ын холбогдох албан тушаалтнуудыг шалгаж, уг тендерийг хуулийн дагуу явуулах боломж нөхцлийг бүрдүүлж өгөхийг хүсэн гомдол гаргаад байна. Нийслэлийн Засаг дарга С.Амарсайханы хэлсэнчлэн тендер ил тод, нээлттэй явагдах ёстой гэж байлаа.

Ноднин ХИХУГ-аас зарласан нүүрсний тендерт орсон “Хазаар бат” компани хамгийн бага үнийн санал оруулсан ч тус газрын дарга Г.Баттулга өөр компанид тендер гүйцэтгэх гэрээг олгосон гэж байв. Үүнийг эсэргүүцэн “Хазаар бат” компанийн зүгээс Сангийн яаманд гомдол гаргаж байсныг эх сурвалж хэлсэн юм.