Асашёорюү цэвэр алтан одонгоор шагнуулна

Украин улсын спортын олон улсын “Алтан Мангуст” шагналын энэ жилийн эзнээр мэргэжлийн сүмо бөхийн их аварга Асашёорюү Д.Дагвадорж шалгарчээ. Энэхүү шагналыг “Мангуст” олон нийтийн байгууллагын тэргүүн, Украины грэпплингийн холбооны ерөнхийлөгч, Украины гавьяат дасгалжуулагч Магомед Магдиев санаачилсан юм.

Энэ жил 11 дэх удаагаа зохион байгуулагдаж байгаа тус шагналыг олгох ёслол есдүгээр сарын 7-нд Одесса хотод болно. Цэвэр алтаар хийсэн одонгоор шагнана гэж зохион байгуулагчид мэдээллээ.

“Одесса медиа” агентлагийн сурвалжлагч Марина Жигалюк их аваргатай холбогдож, тодруулга авсан байна.

-Асашёорюү хурц дайчин барилдаанаараа алдартай байсан. Та маш богино хугацаанд өндөр амжилт гаргасан. Яаж ингэж чадав?

-Би зорилго, мөрөөдлөө хамгийн түрүүнд тавьж, биелүүлэхийн төлөө зүтгэдэг байсан. Мянга гаруй жилийн түүхтэй сүмо бөхийн ёкозүна болж чадсандаа баяртай байдаг. Амжилтад хүрсэн ямар нэг нууц байхгүй. Тамирчдад зөвлөхөд өөртөө зорилго тавь. Тэгээд зорилгоо биелүүлэхийн тулд чадах бүх зүйлээ хий гэж зөвлөмөөр байна.

-Та одоо залуу бөхчүүдтэй ажиллаж байна. Ямар хүн жинхэнэ аварга болдог вэ?

-Хувийн туршлагаасаа харахад залуу тамирчдад дэмжлэг маш чухал байдаг. Сүмод анх орж байсан үеэ дурсан санаад би залуу бөхчүүдийг дэмжихээр шийдсэн. Тэдэнд мэдлэг, ур чадвар заахаас гадна шинэ боломж олгохыг хичээдэг. Сайн багш, санхүүгийн тусламжгүйгээр их спортод орох хэцүү. Украинд спортыг түгээн дэлгэрүүлэхийн тулд ажиллаж байгаа “Мангуст” байгууллагад талархсанаа илэрхийлье. Аварга болоход хэрэгтэй зан чанар гэвэл маш хөдөлмөрч байх ёстой. Мөн дайчин, эрэлхэг зориг их чухал. Өрсөлдөгчөө хүндэлж, хайрлаж байх хэрэгтэй.  

-Та “Алтан Мангуст” шагнал хүртлээ.

-Энэ шагналыг авсандаа их баяртай байна. “Мангуст” байгууллагын ерөнхийлөгч Магомед Магдиевт Украин улсад очих боломж олгосонд баярлалаа. Энэ шагнал тамирчдад урам зориг олгодог. Украин улсад энх тайван, аз жаргал, ялалт хүсэн ерөөе.