“Сэргээштэй” хятад тамирчин ад үзэгдсэн хэвээр

Өмнөд Солонгосын Кванжуд болж байгаа усан спортын ДАШТ хэрүүл маргаантай үргэлжлэн явагдаж байна. Тус тэмцээний чөлөөт сэлэлтийн 400 метрийн зайд түрүүлсэн олимпын гурван удаагийн аварга Хятадын Сунь Янтай мөнгөн медаль хүртсэн Австралийн тамирчин Хортон хамт зогсохгүй гээд шагналын тавцанд гараагүй талаар бид мэдээлсэн билээ.

Энэ явдлын дараа Хятадын фэнүүд Хортоныг айлган сүрдүүлсэн захидал, мессеж маш ихээр бичиж байгаа. “Тэнэг австраличууд бүгд Английн гэмт хэрэгтнүүдийн удам”, “Гэр бүлээр чинь хүйс тэмтэрнэ”, “Имжид бариулж, үхээрэй” гэсэн захидлууд иржээ.
 

Учир нь Сунь Ян өнгөрсөн жил сэргээшийн шинжилгээ өгч байхдаа сорьцоо алхаар цохин хагалж байсан хүн. Мөн 2014 онд сэргээшийн асуудлаар дөнгөж гурван сарын шийтгэл хүлээж байв.
 

Энэ явдлын үргэлжлэл өчигдөр боллоо. Хятад эр энэ удаад чөлөөт сэлэлтийн 200 метрийн зайд тэргүүлэв. Түүнд ялагдсан Их Британийн тамирчин Данкан Скотт сэргээштэй тамирчинтай хамт зураг авхуулахгүй гээд ёслолыг орхин явсан байна.