ҮАБЗ, Засгийн газарт “Тост, Тосон бумба” үндэсний хэлэлцүүлгээс хүсэлт, шаардлага хүргүүллээ

“Байгаль хамгаалах говийн иргэдийн санаачилга” ТББ, “Эрс шинэчлэл хөдөлгөөн”, “Уугуул хөдөлгөөн” ТББ-аас хамтран зохион байгуулсан “Тост, Тосон бумба” үндэсний хэлэлцүүлэг Төрийн ордны Иргэний танхимд бүтэн өдөр үргэлжилж, амжилттай өндөрлөлөө. 

Хэлэлцүүлгийг зохион байгуулагчид дараах таван зүйлийн санаачилга, шаардлага боловсрууллаа. Шаардлагуудыг бүрэн эхээр нь танилцуулъя.

Нэгдүгээрт, Хууль бусаар авсан 153 мянган га газрыг улсын тусгай хамгаалалтад оруулах талаар ярьж тэмцэж байхад дахиад булхай луйврын замаар “Баянтэс”-ийн уурхайн лицензтэй талбайг Уул уурхай, хүнд үйлдвэрийн сайд Д.Сумъяабазар Стратегийн ордод оруулсан баримтыг өнөөдөр иргэний нийгмийн байгууллагууд хэллээ. Тиймээс хууль бус үйлдэл хийж, Үндсэн хууль зөрчсөн байх магадлалтай байгаа учир Уул уурхай, хүнд үйлдвэрийн сайд Д.Сумъяабазарыг огцрох шаардлага хүргүүлж байна. Энэ алдааг нь засах шаардлагыг мөн Засгийн газарт хүргэж байна.

Хоёрдугаарт, Байгаль орчин, аялал жуулчлалын сайд Н.Цэрэнбатын тушаалаар байгуулагдсан хууль зөрчсөн Ажлын хэсгийг татан буулгаж тараах шаардлагыг гаргаж байна.

Гуравдугаарт, Засгийн газрын хэрэг эрхлэх газрын дарга, Монгол Улсын сайд Д.Оюун-Эрдэнээр ахлуулсан шударга, олон талт, хараат бус ажлын хэсгийг байгуулж, урт хугацаатай ажиллаж, 22 булаг шандад нэг бүрчлэн судалгаа явуулж, нэгдсэн дүгнэлт гарган, акт тогтоож ажиллах хүсэлтийг хүргэж байна.

Дөрөвдүгээрт, Үндэсний аюулгүй байдлын зөвлөл, Төрийг гурван өндөрлөгт ирвэс хамгаалагч, биологич Т.Лхагвасүрэнгийн амь насыг хохироосон хэргийг дахин сэргээж, хэргийн үнэн мөнийг шийдвэрлэх үүрэг даалгавар өгөх хүсэлтийг хүргүүлж байна.

Тавдугаарт, Хууль зөрчсөн олон үйлдэл нь ил баримттай тогтоогдож байгаа "Сауд гоби коэл транс" ХХК-ийн уурхайн үйл ажиллагааг нэн даруй зогсоохыг шаардаж байна.

Мөн энэхүү хэлэлцүүлгийг үргэлжлүүлж, Тост, Тосон бумбын асуудлаар хууль эрх зүй, лиценз, биологи, эрүүл мэнд, уул уурхай талаас нь салбар хэлэлцүүлэг зохион байгуулж, Үндэсний хэмжээний томоохон форумыг “Байгаль хамгаалал, хариуцлагатай уул уурхай” сэдвээр Монгол Улсын Ерөнхийлөгчийн ивээл дор зохион байгуулах санаачилга гаргав. 

“Тост, Тосон бумба” үндэсний хэлэлцүүлгийн зохион байгуулагчид болон олон нийтийн хүсэлтийн дагуу орон нутгийн иргэдийн хандив тусламжаар ирвэс хамгаалагч, биологич Т.Лхагвасүмбэрэлийн гэрэлт хөшөөг Тост, Тосон бумбын нуруунд босгохоор болов. Ирэх аравдугаар сард болох Бүх нийтээр мод тарих өдрөөр “Баянтэс”-ийн уурхайн амыг таглан, 10 мянган хайлаасан төгөл бий болгох, суварга босгох санаачилга мөн хэлэлцүүлгээс гаргалаа.

“Өнөөдрийн хэлэлцүүлэг дэвшүүлсэн зорилгоо биелүүлж, үүргээ гүйцэтгэсэн гэж үзэж байна. Энэ бол хариуцлагатай уул уурхайн жишиг тэмцэл байх болно. Зөвхөн өнөөдрийн хэлэлцүүлгээр энэ тэмцэл дуусахгүй, цаашид салбар бүрээр тусдаа хэлэлцүүлэг зохион байгуулж, “Сауд гоби коэл транс” компанийн үйл ажиллагааг зогсоон, “Баянтэс”-ийн уурхайг хаалгах болно. Хэлэлцүүлэгт оролцсон бүх төлөөлөгч, өнөөдөр ирж чадаагүй ч оролцох хүсэлтэй байсан бүх хүмүүст баярлалаа” гэж “Байгаль хамгаалах говийн иргэдийн санаачилга” ТББ-ын тэргүүн, сэтгүүлч Х.Мандахбаяр ярьсан юм.

“Тост, Тосон бумба” үндэсний хэлэлцүүлэгт Байгаль орчин, аялал жуулчлалын яам, Уул уурхай, хүнд үйлдвэрийн яам, “Сауд гоби коэл транс” компанийн төлөөлөл оролцсон юм. Өнөөдрийн хэлэлцүүлэгт 150 гаруй хүн оролцож, Тост, Тосон бумба, хууль бусаар үйл ажиллагаа явуулж буй “Сауд гоби коэл транс” компанийн талаар хэлэлцжээ.

Хэлэлцүүлгийн тойм мэдээллийг ЭНД дарж уншина уу!

БИЧЛЭГ ҮЗЭХ