Монгол Улс агаараас эрэн хайх, аврах ангитай болно

Онцгой байдлын ерөнхий газрын харьяа Агаараас эрэн хайх, аврах анги, Хувцас хэрэглэлийн туршилт, үйлдвэрлэлийн төв, Хөвсгөл аймгийн Галт суманд Гал унтраах, аврах анги, Сэлэнгэ аймгийн Хүдэр сум, Булган аймгийн Хутаг-Өндөр суманд Эрэн хайх, аврах салбар, Хэнтий аймгийн Баян-Адарга сум, Жаргалтхаан сум, Баянхонгор аймгийн Баянцагаан сум, Жаргалант сум, Хөвсгөл аймгийн Цагаан-Үүр сум, Өвөрхангай аймгийн Хужирт суманд Эрэн хайх, аврах бүлгийг тус тус шинээр байгуулах шийдвэрийг Засгийн газраас гаргалаа. 

Мөн Онцгой байдлын Ерөнхий газрын харьяа “Давтан сургалт, сэргээн заслын төв”-ийг “Давтан сургалт, сэргээн заслын төв-113 дугаар анги” гэж өөрчлөн, Сэлэнгэ аймгийн Онцгой байдлын газрын Мандал сум дахь Онцгой байдлын хэлтсийн Гал унтраах, аврах III зэрэглэлийн 19 дүгээр ангийг II зэрэглэлд шилжүүлж, Увс аймгийн Онцгой байдлын газрын Улаангом сум дахь Эрэн хайх, аврах бүлгийг Эрэн хайх, аврах салбар болгон өргөтгөлөө.

Шинээр байгуулагдах агаараас эрэн хайх, аврах ангийг Чингис хаан олон улсын нисэх буудлыг түшиглэн байгуулах, Хувцас хэрэглэлийн туршилт үйлдвэрлэлийн төв нь Үндэсний аврах бригадын харьяа Уул уурхайн аврах ангийн барилга байгууламжийг ашиглах, Гал түймэр унтраах аврах анги, Эрэн хайх, аврах салбар, бүлгийн барилгын асуудлыг тухайн аймаг, орон нутгаас төсөвт ямар нэгэн хүндрэл учруулахгүйгээр шийдвэрлэнэ гэжээ.