МАХН парламент тарахыг дэмжиж, шаардлага хүргүүллээ

Үндсэн хуулийн нэмэлт өөрчлөлттэй холбоотойгоор МАХН-аас өнөөдөр /2019.09.19/ хэвлэлийн бага хурал зарлав.

Ийнхүү сэтгүүлчдийг урих болсон шалтгаан нь Үндсэн хуулийн нэмэлт өөрчлөлтийг Ард нийтийн санал асуулгаар шийдвэрлүүлэхээр олонхийн бүлэг шийдсэнтэй холбоотой байв. Гэвч энэ нь хууль бус гэдгийг тайлбарлах байжээ. Тус хуралдаанд намын дарга Н.Энхбаяр, Ерөнхий нарийн бичгийн дарга Б.Тулга, Нийслэлийн МАХН-ын дарга Э.Эрдэнэжамъян нар болон Мянгатын дарга нар хүрэлцэн иржээ. Тэд юуны өмнө Үндсэн хуулийг хэлэлцэх үеэр ямар нэгэн асуудлыг давхар хэлэлцэж болдоггүй юм. Тиймээс эрх баригчид үүнийг далимдуулан бусад асуудлыг хөндөхгүйгээр Үндсэн хуулийн өөрчлөлтийг дур мэдэн өөрчлөх гэж байгааг эсэргүүцэж байна гэсэн юм.

МАХН парламент тарахыг дэмжсэн ч Үндсэн хуулийн өөрчлөлтийг эсэргүүцлээ

Нөгөө нэг асуудал нь 2016 оны сонгуулийн үр дүнд бүрдсэн энэ удаагийн парламент цаашид үйл ажиллагаа явуулах эрх зүйн чадамжгүй болсон учраас тарахыг шаардсан. Тухайлбал, “60 тэрбум”, "Жижиг дунд үйлдвэрийг хөгжүүлэх сан"-гаас их хэмжээний зээл авсан гишүүд, Концессын гэрээ, Дубайн гэрээ гээд шил шилээ дарсан олон асуудлыг шийдэж чадаагүй. Хамгийн том асуудал нь “Үндсэн хуулийн нэмэлт өөрчлөлт оруулах журмын тухай хууль” болон УИХ-ын чуулганы “Дэгийн тухай хууль”-ийг тус тус зөрчиж, төрийн эргэлт хийх замаар Үндсэн хуульд нэмэлт өөрчлөлт хийхээр улайран дайрч байгаа гээд хэд хэдэн асуудлыг МАХН-чууд хөндсөн. 

Энэ үеэр МАХН-ын дарга Н.Энхбаяр “МАН-ын дарга, Ерөнхий сайд У.Хүрэлсүх парламентыг тараахаар гишүүдээр гарын үсэг цуглуулж байгаа гэж сонссон. Үүнийг дэмжиж байгаа. Гэхдээ У.Хүрэлсүх шударга ёсны төлөө, зөв зүйлийн төлөө ийм шийдэлд хүрэв үү, эсвэл өөрсдийн буруу үйлдлээ нуух гэж ингэв үү гэдэг сонирхолтой байна” хэмээсэн юм. Ямартай ч МАХН парламент тарахыг дэмжиж байгаа аж.