ШЕЗ: Сургалтыг төрөлжүүлэхээр тохиролцов

Монгол Улсын Шүүхийн ерөнхий зөвлөлийн гишүүн Э.Батбаяр БНХАУ-ын Ардын дээд шүүхийн дэргэдэх Үндэсний шүүгчдийн коллежийн олон улсын сургалт хариуцсан дэд дарга, хатагтай Фенг Венлитэй өчигдөр (2019.10.14) уулзаж, хамтын ажиллагааны талаар санал солилцлоо.

Талууд 2018 онд байгуулсан Санамж бичгийн хүрээнд хамтарсан эрдэм шинжилгээний ажлыг тууштай дэмжиж ажиллах, сургалтын хөтөлбөрийг эрүү,  иргэн, захиргааны хэргийн шүүхийн шүүгч, захиргааны ажилтнуудад дагнасан хэлбэрээр зохион байгуулахаар тохиролцов. Мөн Монголын шүүхийн шинэтгэлийг гүнзгийрүүлэх ажлын хүрээнд цахим шүүх байгуулах, шүүхийг цахимжуулах чиглэлээр тусгайлсан хөтөлбөр боловсруулж ажиллах боломжийн талаар ярилцлаа.

Шүүхийн ерөнхий зөвлөлийн гишүүн Э.Батбаяр хоёр орны шүүхийн байгууллагуудын хамтын ажиллагаа 2007 оноос эрчимтэй хөгжиж, Хятадын Үндэсний шүүгчдийн коллежоос Монгол Улсын шүүхийн шүүгч, захиргааны ажилтнуудын чадавхыг дээшлүүлэх зорилгоор 10 удаагийн хөтөлбөр хэрэгжүүлж байгаад талархал илэрхийлэв. Шүүхийн ерөнхий зөвлөлийн дарга Н.Лүндэндорж өнгөрсөн онд БНХАУ-д албан ёсны айлчлал хийхдээ Ардын дээд шүүхийн ерөнхийлөгч Жоу Чиангтай уулзаж, Санамж бичиг байгуулсан нь хамтын ажиллагааны шинэ хуудас нээсний илрэл хэмээн онцлов. 

Хатагтай Фенг Вэнли хоёр байгууллагын хамтын ажиллагаанд сэтгэл хангалуун байдгаа илэрхийллээ. Мөн Монгол Улсын Шүүхийн ерөнхий зөвлөлийн 25 жилийн ойд зориулсан Олон улсын эрдэм шинжилгээний хуралд оролцож илтгэл тавьснаа дурсан ярьж цаашид бүх талын хамтын ажиллагааг дэмжиж ажиллана гэв.

Тус уулзалтад Шүүхийн ерөнхий зөвлөлийн Гүйцэтгэх нарийн бичгийн дарга О.Амгаланбаатар, Шүүхийн хамтын ажиллагаа, олон нийттэй харилцах газрын дарга Б.Биндэръяа нар байлцав.

ШҮҮХИЙН ХАМТЫН АЖИЛЛАГАА, ОЛОН НИЙТТЭЙ ХАРИЛЦАХ ГАЗАР