ГИХГ: Хятад иргэдийн паспортыг хасалт хийлгэхээр хил нэвтрүүлжээ

БНХАУ-ын иргэдийн их хэмжээний паспорт хил нэвтэрсэн асуудлыг шалгахад, Монгол Улсад түр оршин суух зөвшөөрлөө хасуулах зорилготой байжээ.

Энэ талаар Гадаадын иргэн, харьяатын газраас мэдээллээ.

Тодруулбал, "Чингис хаан" нисэх онгоцны буудалд 2019.12.04-нд БНХАУ-ын иргэн Е нь их хэмжээний Хятад иргэдийн паспортыг хил давуулахыг завдсан үйлдлийг илрүүлсэн тухай Гаалийн ерөнхий газраас мэдээлсэн.

Тэгвэл шалгалтын хүрээнд, тэдгээр паспортын эзэд нь “Тавантолгой шин” ХХК-ийн шугамаар энэ оны арванхоёрдугаар сарын 31 хүртэл Монгол Улсад хөдөлмөр эрхлэхээр зөвшөөрөл авсан байна. Энэ хугацаандаа буцаж ирэхгүйгээр бүр мөсөн нутаг буцсан тул хүлээсэн үүргийнхээ хүрээнд паспортдоо "хасав" тэмдэглэгээ хийлгэж, оршин суух зөвшөөрлийг нь хураалгахаар ийнхүү хилээр оруулж ирснийг нь тогтоосон байна.