Путин жүдогийн 6-р дан авахаас татгалзжээ

ОХУ-ын Ерөнхийлөгч Владимир Путин жүдо бөхийн 6-р дан авахаас татгалзсан талаар Японы жүдо бөхийн холбооны тэргүүн Ясүхиро Ямашита саяхан РИА агентлагт ярилцлага өгөхдөө дурссан байна.

Ерөнхийлөгч В.Путин 2000 онд Японд анх айлчлахад нь япончууд түүнд 6-р даны улаан цагаан бүс өгөхийг хүссэн ч Путин татгалзсан ажээ.

Ясүхиро Ямашита “Путин Кодоканд өөрийнхөө жүдоги өмсгөлтэй ирсэн байсан. Түүний жүдогийн техник маш сайн байсан тул бид 6-р дан өгөх гэтэл тэр хүлээж аваагүй. Путин микрофон аваад “Энэ дан, энэ бүс маш их үүрэг хариуцлага гэдгийг би сайн ойлгож байна. Харамсалтай нь би 6-р дан авах хэмжээнд хүрээгүй. Энэ бүсийг зүүх гавьяа надад байхгүй” гэж хэлж билээ” гэж ярьсан байна.

Гэхдээ 2012 онд Олон улсын жүдо бөхийн холбооны тэргүүн Мариус Визер 60 насны ойгоор нь жүдо бөхийн 8-р дан өгөхөд хүлээн авчээ.

Владимир Путин самбо, жүдогийн спортын мастер цолтой. 1998 онд самбо бөхийн гавьяат дасгалжуулагч цол хүртсэн. Кёкүшинкай каратэгийн 8-р дан, Гожүрюү каратэгийн 9-р дантай.