“Барселона” Вальвердег халж, Кике Сетьенийг томиллоо

Испанийн “Барселона” баг ерөнхий дасгалжуулагч Эрнесто Вальвердег халж, “Бетис” багийн дасгалжуулагч асан Кике Сетьенийг шинэ дасгалжуулагчаар томиллоо

“Барса” 2003 оноос хойш анх удаагаа улирлын дундуур дасгалжуулагчаа халж байгаа нь энэ юм. Тэр үед лигийн нэгдүгээр байрнаас 20 оноо дутуу явсан тул Луи ван Галийг халж байлаа. Харин энэ удаад тэд Ла лигийн нэгдүгээр байрт явж байгаа ч Супер Цомын тэмцээнээс хасагдсан, Эрнесто багаа удирдаж чадахгүй байгаа, баг урт хугацааны хямралд орох аюултай зэргийг харгалзан үзээд халахаас өөр аргагүй болсон байна.
 

Вальверде 2017 онд “Барселона”-д ирж, хоёр удаа лигт түрүүлэн, Испанийн цомын тэмцээн, Супер Цомд тус бүр нэг удаа түрүүлж байлаа. Түүний удирдлага дор “Барса” 163 албан ёсны тоглолт хийхдээ 108 ялж (66,25%), 35 тэнцэн (21,47%), 20 ялагджээ (12,26%).
 

• Шинэ дасгалжуулагч Кике Сетьен 61 настай. 2,5 жилийн гэрээ байгуулсан. Түүнийг байхад “Бетис” баг бөмбөг эзэмшихдээ хамгийн гаргуун баг байлаа. 2017 оны намар “Реал”-ыг 1:0 ялж, 2018 оны есдүгээр сард “Леганес”-тай тоглохдоо 82,5 хувь бөмбөг эзэмшиж, Ла Лигийн рекорд тогтоосон. 2018 оны 11 дүгээр сард “Камп Ноу”-д “Барселона”-г  4:3 ялж, 2019 оны тавдугаар сард “Реал”-ыг 2:1 ялж байв.
   
• Сетьен богино дамжуулалт ялалтын эх үндэс гэж үздэг. Шатар тоглох дуртай. Карякин, Крамник, Каспаровтой тоглож байсан. Шатар сайн тоглодог нь түүний давуу тал гэж үзэх шинжээч олон.
   
• “Бетис” баг түүнийг өнгөрсөн улирлын сүүлийн хагаст халсан. Кике тэр жил 3-5-р сард 3 ялж, 3 тэнцэн, 8 ялагдаад байлаа.