Бундеслиг ирэх сард эхэлж магадгүй

Германы хөлбөмбөгийн Бундеслигийн үлдсэн тойргийн тоглолтууд тавдугаар сарын 9-нөөс эхлэн явагдаж магадгүй болжээ.

Германы хөлбөмбөгийн холбооны Ерөнхий захирал Кристиан Зайферт “Бидэнд хэд хэдэн эерэг мэдээ ирээд байгаа. Бундеслиг, хоёрдугаар лигийн тоглолтууд эхлэх боломжтой болсон. Эмнэлгийн мэргэжилтэн, шинжээчид багийн бэлтгэлээс авхуулаад тоглолтыг хэрхэн зохион байгуулах бүх зааврыг гаргасан. Талбайн гадна юу хийх талаар ч бүх зааварчилгаа байна. Эрсдэлтэй ч багууд бас хариуцлага хүлээнэ. Улс төрчид бидэнд итгэл хүлээлгэж байна. Хөлбөмбөгчид бид бусад салбарынханд үлгэр жишээ үзүүлнэ. Ариутгалын арга хэмжээ, хамгаалалт гээд бүх зүйлд сахилга баттай хандах болно. Үзэгчидгүй тоглолт болох ч өнөөгийн нөхцөлд энэ нь эдийн засгийн хувьд хамгийн шилдэг сонголт юм. Холбооны зөвлөл хуралдаж, багийн удирдлагуудтай уулзаж ярилцана” гэж мэдэгджээ.

Хэрэв Бундеслиг тавдугаар сарын 9-нд дахин эхэлбэл зургаадугаар сарын 30-нд бүх тойргийн тоглолт дуусна.

Германд коронавирусний халдварын тоо 141672, 4404 хүн амиа алдаад байгаа юм.