М.Уранцэцэгийг Токиод хүрэл медаль хүртэнэ гэж зөгнөжээ

Дэлхий нийтийг хамарсан цар тахлын улмаас хүн төрөлхтний спортын хамгийн том баяр зуны олимпын наадам нэг жилээр хойшилсон билээ. ОХУ-ын “Весь спорт” агентлагаас “Болоогүй олимп” гэсэн уран зөгнөл, судалгаа, шинжилгээний төсөл хэрэгжүүлж байна. Тус агентлагийн спортын шинжээч Дмитрий Туленков 16 хоногийн турш хэрэв Токиогийн олимп энэ жил болсон бол яах байсныг уран зөгнөл, баримт нотолгоо хослуулан тайлбарлаж байгаа юм. Ингээд түүний эхний өдрийн тоймтой танилцацгаая.

“Токио 2020” наадмын эхний өдөр буудлага, байт харваа, дугуй, хүндийг өргөлт, жүдо, таэквондо, туялзуур сэлэм гэсэн төрлүүдэд 11 багц медалийн төлөө тамирчид өрсөлдсөн. Анхны медалийг Энэтхэгийн буудлагын тамирчин бүсгүй Анюм Мудгил авсан бол эрчүүдээс Хятадын буудлагын тамирчин Пан Вей хамгийн түрүүнд алтан медаль зүүлээ. Эхний өдрийн тэмцээний дараа багийн дүнгээр Өмнөд Солонгос (2-2-2) тэргүүлж, Хятад (2-1-2), Япон (1-1-0) удаалж байна. Азийн тамирчид эхний өдөр 7 алтан медаль авсан бол Европ тивийнхэн 4 алт, харин америкчууд нэг ч алтан медаль авсангүй.

Токиогийн олимпын наадмын нэгэн сонирхол татсан зүйл бол япончууд нутагтаа үндэсний спорт жүдогоороо бүх жинд түрүүлж чадах уу гэдэг асуудал байсан. Тэгвэл эхний өдөр л чадахгүй гэдэг нь тодорхой болсон.

Уламжлал ёсоор эхний өдөр хөнгөн жингийнхэн татами дээр гарлаа.
 

60 кг-ийн жингийн финалд Рюүжү Нагаяма Казахстаны Елдос Сметовыг ялсан бол эмэгтэйчүүдийн 48 кг-д Фүна Тонаки Косовогийн Дистриа Красникиг дийлсэнгүй. Косовогийн эмэгтэй жүдочид дэлхийг донсолгосон хэвээр. 2016 оны олимпод Майлинда Келменди түрүүлж байсан бол 2019 оны ДАШТ-д гурван косово бүсгүй хагас шигшээд шалгарсан. Харин Токиод Красникигийн од гийх цаг ирсэн байна. Японы Тонаки 2018, 2019 оны ДАШТ-ий дараа ийнхүү гурван том тэмцээний финалд дараалан ялагдаж байгаа нь энэ юм. Уг нь Тонаки гол өрсөлдөгч Украины Дарья Белодедийг хагас шигшээд ялаад байсан юм. Монголын жүдоч М.Уранцэцэг хагас шигшээд косово бүсгүйд ялагдлаа.

XXXII Зуны олимп. Токио (Япон)

Жүдо

Эмэгтэй 48 кг

1. Дистрия Красники (Косово).

2. Фүна Тонаки (Япон).

3. Дарья Белодед (Украин), М.Уранцэцэг (Монгол).

Эрэгтэй 60 кг

1. Рюүжү Нагаяма (Япон).

2. Елдос Сметов (Казахстан).

3. Лухуми Чхвимиани (Гүрж), Роберт Мшвидобадзе (ОХУ).