Ажлаа хийх үү, хүүхдээ зөөх үү гэдэг СОНГОЛТ л үлдлээ

Ковид-19 цар тахлаас сэргийлэхтэй холбоотойгоор 2020-2021 оны хичээлийн жилд Ерөнхий боловсролын сургуулиуд танхимын гурван өдөр, цахимаар хоёр өдөр хичээллэх захирамжийг БСШУЯ-аас гаргасан.

Энэ шийдвэрийн хүрээнд сурагчид хоёр цаг гучин минутад танхимын сургалтаар хичээл заалгаж байна. Хичээл эхэлсэн эхний гурав хоногийн байдлаар харахад энэ шийдвэр хүн бүрт маш хүндээр тусаж байна. Хүүхдээ сургуульд зөөж байгаа эцэг, эхчүүдэд чирэгдэл болж, хоёроос дээш хүүхэдтэй гэр бүл бол ажил хийх тухай бодоход ч хүндрэлтэй болж эхэллээ. Энэ талаар "SPEAK OUT" буланд иргэд байр сууриа ингэж илэрхийлэв. 

Б. Одончимэг: Хүүхдээ зөөхөд 2-3 цагийн хугацаа зарцуулж байна, ажил хийх боломжгүй боллоо
 

-Миний хувьд "Эрдмийн өргөө" цогцолборт 1 болон 4-р ангийн хоёр хүүхдээ хичээлд нь зөөж байгаа ганц бие ээж хүн. Хичээлийн шинэ жил эхлээд ердөө гурав хонож байхад хүндрэлтэй асуудлууд маш их тулгарч байна. Ажил хийж, амьдралаа залгуулах боломжгүй болж байна. Хүүхдүүдийн хоорондын хичээл эхлэх цаг болон дуусах цаг, хичээл орох өдрүүд зөрж байгаа. Ажил хийх үү, хүүхдээ хичээлд нь зөөх үү гэдэг сонголттой нүүр тулж эхэллээ. Ажлын байр, гэр хороондын зай хол учраас хүүхдээ зөөхөд ойролцоогоор 2-3 цагийн хугацаа зарцуулж байна. Нэгийг нь хүргэж өгөөд буцаад ажил дээрээ очиход нөгөө хүүхдээ сургуулиас авах цаг болж байх жишээний. Хичээлийн жил эхэлсэн өдрөөс л ийм байдалтай байна. Хичээлийн цагийг бүтэн цагаар нь үлдээх эсвэл хичээл оруулахыг нь болиулах хэрэгтэй юм шиг санагдаж байна. Бас нэг саналтай байгаа нь ажил олгогч нар ажилчдадаа хүүхдээ хичээлд нь зөөх боломж нөхцөлөөр хангаж өгөх ч юм уу, ямар нэгэн зөв шийдэл эцэг, эхчүүдэд хэрэгтэй байна. 

Н. Алтан: Хичээлийн цагийг бүтэн цагаар оруулбал бичиж, уншиж сурч байгаа хүүхдүүдийн боловсролд илүү хэрэгтэй
 

-Чингэлтэй дүүргийн нутаг дэвсгэрт байрладаг 50-р сургуульд хүүхдээ зөөж байгаа. Ажлын хажууд сургууль нь байрладаг учраас ажлын дундуур олон цаг гарахгүй зохицуулж болж байгаа ч олон цагийн турш хүүхдээ ажил дээрээ харах шаардлагатай болдог. Энэ нь нэг талаараа зөөх, хүргэж өгөх асуудалгүй байгаа хэдий ч хүүхэд олон цагаар ажлын байран дээрээ харна гэдэг өөрөө асуудал болоод байна. Манай хүүхдийн анхны хичээлийн жил болохоор анхаарал тавьж, олон цаг зарцуулах хэрэгтэй байгаа. Гэтэл ажил дээр тохь тухгүй байсаар орой нь хоёулаа гэртээ ядраад орох гэх мэт асуудал үүсэж байна. Миний хувьд хичээлийн цагийг бүтэн цагаар оруулбал ядаж л дөнгөж бичиж, сурах гэж байгаа хүүхдүүдэд маань илүү хэрэгтэй байх гэж үзэж байна.

М.Зүгдэрмаа: Үлдсэн ажлын хоёр өдөрт нь хүүхдийг хэн гэрт харах болж байна
 

-Манай охин 141-р сургуулийн хоёрдугаар ангийн хоёрдугаар группт суралцаж байна. Хичээлийн цаг нь өдрийн 13:30-аас эхэлж, 15:10 минутад тардаг.  Ихэвчлэн ажилтай учраас ажлын дундуур зөөх боломжгүй болж байна. Өмнө нь бүтэн цагаар хичээллэдэг байхад хичээлийг нь тараад л шууд өдөр өнжүүлэхэд өгдөг байсан. Харин энэ хичээлийн жил бага цагаар хичээллэж байгаа нь маш их чирэгдэл дагуулж байна. Жишээ нь, би өглөө ажилдаа хүүхдээ авч явдаг. Ингээд хичээлийн цаг нь дөхөнгүүт ажлын дундуур чөлөө авч, сургуульд нь хүргэж өгөөд, гадаа нь хүлээж сууж байгаад буцаад ажил руугаа авч явж байна. Өдөр өнжүүлэх төвд өгөх гэсэн боловч сургуулийн ойр орчимд ажилладаг Өдөр өнжүүлэх байхгүй. Ажлын гурван өдөр хичээллэхээр бусад хоёр өдөрт нь хүүхдээ хэнээр харуулах гэдэг том асуудал бидэнд тулгарч байна. Айл бүхэнд энэ сэдэв асуудал болж байгаа шүү. Тиймээс энэ хичээлийн жилийн хичээллэх хуваарийг дахин нэг харж үзэх шаардлагатай байх гэж бодож байна. 

Х.Сугармаа: Хичээллэх өдөр цаг нь өөр байгаа учраас бага хүндрэл гарч байгаа
 

-Энэ жил манайх нэг болон зургаадугаар ангийн хоёр сурагч сургаж байна. Би өөрөө хүүхдээ зөөх боломжгүй, ажилтай учраас дунд ангийн ахаар нь бага хүүхдээ хүргэж өгч, авахуулдаг. Энэ хичээлийн жил манай хүүхдүүдийн хичээллэх өдөр цаг нь өөр байгаа учраас бага хүндрэл гарч байгаа.