Орос боксчинд 3 жилийн тэнсэн харгалзах ял оноолоо

ОХУ-ын боксчин Георгий Кушиташвили энэ оны хоёрдугаар сард хар тамхи хадгалсан, цагдаа нарын биед халдсан хэргээр баривчлагдсан талаар бид мэдээлсэн. ОХУ-ын “Росгвард”-ийн дайчид Москва хотын төвд сэжигтэй хоёр этгээдийг саатуулан шалгахад, биеэс нь кокаин илэрсэн байна. Боксчны найз эсэргүүцэл үзүүлээгүй бол Кушиташвили нэг ажилтны хамрыг гэмтээгээд зугтсан ч баригджээ.

Ингээд түүнд хар тамхи хадгалсан, тараасан (10-15 жилийн ял), “Росгвард”-ийн ажилтны биед халдсан (200 мянган рублийн торгууль, 5 жил хүртэл олон нийтийн ажил хийлгэх, 6 сараас  5 жил хүртэл хорих) хэрэгт эрүүгийн хэрэг үүсгэн шалгаж байсан юм. Энэ сарын 10-нд Москва хотын шүүхээс Кушиташвилид  3 жилийн тэнсэн харгалзах ял оноолоо.

Кушиташвили Буриадын Бичүүр аймгийн уугуул. 24 настай. 2015, 2018 оны ОХУ-ын аварга. 81 кг-ийн жинд тоглодог, жиндээ Оросын хамгийн шилдэг тамирчин. 2019 оны Екатеринбургт болсон ДАШТ-д шагналт байрт шалгарсан. Буриадын цэргийн ангид алба хааж байгаа ч Армийн ЦСКА багт хичээллэж, байсан юм.

ОХУ-ын Боксын холбооны тэргүүн Умар Кремлев Георгий Кушиташвилигийн ОХУ-ын шигшээ багт тоглох эрхийг бүх насаар нь хассанаа мэдэгдээд “Хар тамхи хэрэглэнэ гэдэг том гэмт хэрэг. Түүнийг сонирхогчдын боксоос хассан. Харин мэргэжлийн бокст орох гэвэл бид саад болохгүй” гэж мэдэгджээ.