Зодог тайлсан Хабибын талаар ХЭН ЮУ ХЭЛЭВ?

АНУ-ын Жастин Гэтжиг ялж, UFC холбооны хөнгөн жингийн аваргын бүсээ амжилттай хамгаалсан дагестан залуу Хабиб Нурмагомедов зодог тайлснаа зарласан нь холимог тулаан төдийгүй дэлхийн спортын ертөнцийг доргиолоо. Хабиб мэргэжлийн тэвцанд 29 тулалдаж, 29 ялсан тамирчин. Ганц ялахад л 30 ялалттайгаар зодог тайлах боломжтой. Гэвч ээж нь түүнийг дахин битгий тулалд гэж хүссэн, хүү ээжийнхээ үгийг дагасан юм.

Ингээд Хабибын ялалт болон зодог тайлсан талаар алдартнууд юу өгүүлснийг сонирхоцгооё.
 

Хавьер Мендес (Хабибын дасгалжуулагч): Бүх цаг үеийн шилдэг тамирчин рингнээс буусан ч агуу дасгалжуулагч төрөн гарч байна

Стипе Миочич: Хабиб баяр хүргэе. Чи гавьяаны амралтаа эдлэх эрхтэй хүн.

Спортын тоймч Ариэль Хельвани: Хабиб октагоны голд уйллаа. Аавыгаа алдсаныхаа дараа аварга болоод Майкл Жордан уйлж байсантай ижилхэн санагдлаа.

UFC холбооны аварга асан Ти Жей Диллашоу: Үнэхээр гайхамшигтай замнал. Хабибыг  Pound-for-Pound чансааны нэгт бичихгүй бол өөр хэнийг бичих билээ.

ОХУ-ын Ерөнхийлөгчийн хэвлэлийн албаны дарга Дмитрий Песков: Бид түүний ялалтад баярлаж байна. Баяр хүргэе. Зодог тайлах бол түүний өөрийнх нь шийдвэр. Ерөнхийлөгч В.Путин утсаар түүнд баяр хүргэсэн.

Дуучин Юрий Лоза: Тамиричн хүн ямар замаар явахаа өөрөө шийдэх ёстой. Хабиб алдар хүндийн оргилд байх үедээ явах шийдвэр гаргалаа. Тэр одоо хүссэн юмаа хийж чадна. Дагестандаа туслаж болно. Цахим ертөнцөд маш их алдартай тул Төрийн Думд орж ч болох юм. Сансрын нисэгч Гагарин шиг дэлхийд Орос орноо сурталчилж болно.
 

Криштиану Роналду: Анддаа баяр хүргэе. Аав чинь чамаар бахархаж байгаа

UFC холбооны анхны орос аварга Олег Тактаров: Хабиб хангалттай хэмжээний мөнгөтэй болсон. Тэр домог хэвээр зодог тайллаа. Фёдор Емельяненко ингэж зодог тайлах ёстой байсан юм. Хабиб их сургуулийн Эдийн засгийн ангид элссэн гэж дуулсан. Одоо тэр Конороос дутахгүй бизнес эрхлэгч болж чадна. Бизнесийн салбарт Конор нь Хабибаас хэдэн алхмын өмнө явж байгаа.

Холимог тулаанч Александр Шлеменко: Аав нь нас барсны дараа би Хабибыг зодог тайлах нь гэж мэдэж байсан. Аавгүй тулалдаад яах билээ? Ямар ч утгагүй. Хабиб агуу замнал туулсан. Тэр Жон Жонс, Фёдор Емельяненко хоёроос илүү.

Боксын дэлхийн аварга асан Төрийн Думын депутат Николай Валуев: Уг нь 30 ялалттай зодог тайлсан бол. Гэхдээ жин хасах түүнд улам хэцүү болоод байгаа нь харагдлаа. Ааваа алдсан, ээждээ амалсан гээд түүнд зодог тайлах маш олон шалтгаан байлаа. Гэхдээ л арай эрт байна. Рингэнд дахин эргэн ирнэ гэхээр Хабиб хэлснээсээ буцдаг хүн биш тул үгүй л болов уу.

Тедди Атлас: Би Хабибын талийгаач аавд баяр хүргэмээр байна. Та омог бардам, хүчирхэг аваргыг дэлхийд бэлэглэжээ. Та жинхэнэ од хүүтэй юм.

Златан Ибрагимович: Хабиб бол жин харгалзахгүй хамгийн шилдэг тулаанч. Зүрх сэтгэлээ дагаарай.

Александр Емельяненко: Хабиб жинхэнэ аварга ч агуу тулаанч гэж түүнийг нэрлэхгүй байх. Хабиб бол жирийн нэг сайн тамирчин. Тэр маш эрт зодог тайллаа. Ээжтэйгээ сайн ярьж, 30 дахь тулаандаа орох хэрэгтэй байлаа. Тэр хангалттай их мөнгөтэй. Дагестанд биш гэхэд Америкт ажил хийж чадна.

Портленд багийн тоглогч Дэмиан Лиллард: Чөтгөр алгад, Хабиб зодог тайлчихлаа. Тэр жинхэнэ мангас байсан. Харамсалтай.
 

UFC холбооны тэргүүн Дана Уайт: Хабиб, баяр хүргэе. Чи зорилгоо биелүүлсэн. Чи дэлхийн шилдэг тулаанч, спортын түүхэн дэх агуу тамирчин. 29-0. Тэр буцаж ирэхгүй байх. Одоо бие, сэтгэлийн шархаа эдгээх цаг.

Жастин Гетжи: Хабиб явснаар би хөнгөн жингийн хамгийн шилдэг тамирчин боллоо. Хэрэв Конор аваргын бүс авахыг хүсэж байвал хүрээд ир. Би бэлэн байна.