Асанояма гэмтэж, тэмцээнээс гарлаа

Мэргэжлийн сүмо бөхийн 11 дүгээр сарын тэмцээн Токио хотод үргэлжлэн явагдаж байна.

Өчигдөр комүсүби Тэрүнофүжид ялагдсан озэки Асанояма өнөөдрөөс тэмцээнийг орхилоо. Асанояма энэ башёд эхний хоёр өдрийн байдлаар 1 даваа, 1 унаатай байлаа. Асанояма анх удаа гэмтлийн улмаас тэмцээнээс гарч байгаа нь энэ юм.

Түүнийг Тэрүнофүжид ялагдсаны дараа тайлбарлагч Китанофүжи “Үнэхээр бүр сэтгэлээр унамаар муу барилдлаа. Хэлэх үг алга. Тэмцээний өмнө бөхчүүдийн хамтарсан бэлтэл болж, гэмтэлтэй ёкозүна Хакүхо хүртэл оролцож байхад Асанояма ирээгүй. Өнгөрсөн башёд гурав дараалан унахад нь би хатуу үг хэлсэн. Харин тэр шүүмжлэлийг хүлээн аваагүй бололтой” гэж шүүмжилсэн билээ.