Турк чөлөөт бөхийн Дэлхийн Цомд оролцоно

Ирэх 12 дугаар сард болох чөлөөт бөхийн Дэлхийн Цомын тэмцээнд оролцоно гэдгээ Туркийн бөхийн холбооноос зарлалаа. Туркийн шигшээ багийн дасгалжуулагч, орос мэргэжилтэн Исак Ирбайханов ОХУ-ын сэтгүүлчдийн асуултад энэ талаар ярьсан байна.

- Дэлхийн Цомд Туркийн шигшээ баг оролцох уу?

- Бүтэн багаар оролцохоор бэлтгэж байна. Энэ жил бид Европын АШТ, Варшав, Москвагийн тэмцээнд оролцсон. Шигшээ баг таван удаа цугларалт хийлээ.

- Туркт цар тахал ямар хэмжээнд байна вэ?

- Бусад орны нэгэн адил хүнд байна. Тэмцээн зохион байгуулах хориотой. Аюулгүй байдлыг бүрэн хангасны дараа л цугларалт хийж байгаа.

- Энэ жил ДАШТ-ийг Дэлхийн Цом болгон өөрчиллөө.

- Харамсалтай байна. Дэлхийн аваргаас медаль авсан бөхчүүдэд тэтгэлэг олгодог болохоор бөхчүүд хамгийн их харамссан байх. Дэлхийн Цом гэдэг яаж ч бодсон дэлхийн аваргын тэмцээн биш шүү дээ. Гэхдээ ДБНХ-ноос шагналын сангаа нэмсэн байна.

- Жин тус бүрд 10 мянган ам.доллар хуваарилсан.

- Зөв шийдвэр. Цар тахлаас болж, орлогогүй, амьдрал нь доройтсон тамирчин их байна.  

- Туркийн шигшээ багийн бүрэлдэхүүн тодров уу?

- Одоохондоо үгүй. 125 кг-д Таха Акгуль барилдах нь тодорхой. Мөрний бэртлийн улмаас хагалгаанд орсон. Дахиад бага зэрэг гэмтэхэд л сэдрэх аюултай ч удаан барилдаагүй болохоор түүнд тэмцээнд орох зайлшгүй шаардлага байна. Таха Дэлхийн Цомд барилдах эсэхээ өөрөө шийднэ. Бусад бөхчүүдийг сүүлийн цугларалтын дараа сонгоно.

- Сүүлийн цугларалт хэзээ болох вэ?

- Ирэх сарын 1-нд Эльмадагад эхэлнэ. Азербайжаны шигшээтэй хамтарсан бэлтгэлтэй. Тэнд жижиг тэмцээн зохион байгуулна. Бид Сербид 12 дугаар сарын 13-нд очно. Одоо манай ганц сул тал бол тэмцээн уралдааны дутагдал байна.