ОЛОН ӨНГӨ: Хүний хэрэгцээ цөм бүрдэхэд...

Хүнд физиологийн хэрэгцээ, амгалан тайван байх хэрэгцээ, хүмүүстэй холбогдох хэрэгцээ, өөрийгөө хүндэтгэх хэрэгцээ, өөрийгөө хөгжүүлэх хэрэгцээ цөм бүрэлдэж байж аз жаргалтай болдог гэж судлаачид үздэг. Гэтэл цар тахлын үед хүмүүстэй харилцаж холбогдох нийгмийн хэрэгцээ нэг ёсондоо цахимжиж байгааг бид бүхэн харж сууна. Төрийн байгууллагаас үйлчилгээ авъя гэхэд шаардлагатай бол цахимаар холбогдож үйлчлүүлэхийг зөвлөөд, хэн нэгэн албан хаагчийнхаа утасны дугаарыг өгөөд буцааж байна. Эсвэл дотогш нэвтрүүлэхгүй хаалганыхаа гадна хэрэгцээт мэдээллээ үлдээсэн аж ахуйн нэгжүүд ч байна.

Хувийн байгууллагууд л аргагүйдэж зарлагаа нөхөхийн тулд чармайн ажиллах нь цар тахлын тохиолдолд илүү ажиглагдах юм. Нэмээд, баяр ёслолын арга хэмжээг улсын, хувийн аль ч байгууллага тэмдэглэхгүй, олон нийтийн тээврийн хэрэгслээр аль болох зорчихгүй байх, бөөгнөрөл үүсгэхгүй байхыг бүх шатандаа анхааруулсаар байгаа учраас цар тахлын үед хүний нийгмийн хэрэгцээ хэдийн хумигдчихлаа. Тиймээс бухимдах, сэтгэл гутрах, өөрийнхөө үнэлэмжийг бууруулах гээд сөрөг сэтгэл хөдлөлөө хянах хэрэгтэйг сэтгэл зүйчид зөвлөж байна. Хэрвээ энэ мэт сөрөг сэтгэл хөдлөл илэрвэл дээрх таван хэрэгцээний аль нь танд дутагдаж байгааг анхааралтай ажиглах хэрэгтэй гэнэ. Дараа нь, хэрэгцээгээ нөхөх шалтгааныг бодож олох болох нь ээ. Бусадтай онлайнаар харилцах, дүрсээ харж ярилцах, ном унших, хөгжим сонсох, гэрээ цэвэрлэх, тэмдэглэл хөтлөх, гадаад хэл сурах, шинэ зорилготой болох гээд хүсэл байгаад хичээвэл өөрийгөө уйдаахгүйгээр эерэг зуршил бүтээх боломж хангалттай байгаа шүү.