Улсын нөөцөөс 3800 тонн өвсийг малчдад ҮНЭГҮЙ ОЛГОНО

Хүйтний эрч чангарч, цас унаснаас болж зарим аймгуудад өвөлжилт хүндэрсэн нөхцөл байдалтай байна. Иймд Засгийн газрын гишүүдэд нөхцөл байдлыг дүгнэн танилцуулж, малчдад чиглэсэн багц арга хэмжээг Засгийн газрын өчигдрийн (2020.12.16) хуралдаанаас гаргасан. 

Намраас хойш улсын хэмжээнд зудын эрсдэлийн үнэлгээ хийсэн. 10 аймгийн 72 суманд өвөлжилт хүндрэх эрсдэлтэй байна. Үүн дотор Баянхонгор аймаг хамгийн эрсдэлтэй байгаа. Оторт явж байгаа нийт малчдад дэмжлэг үзүүлэхээр боллоо. Улсын нөөцөөс 3,800 тонн өвсийг үнэгүй, 1,900 тонн тэжээлийг 50 хувийн хөнгөлөлттэй үнээр малчдад олгох ажлыг эхлүүлэхээр болсон юм.

Өвөлжилт нэн хүндрэлтэй байгаа Баянхонгор, Өвөрхангай, Дундговь аймгийн бүх сумдад хүндэвтэр байгаа Говь-Алтай, Өмнөговь аймгийн зарим сумдад отроор явж байгаа малчдад зориулж, Хүнс, хөдөө аж ахуй, хөнгөн үйлдвэрийн яамны дэргэд хэрэгжиж байгаа Дэлхийн банкны Мал аж ахуйн эдийн засгийн эргэлтийг нэмэгдүүлэх төслөөс 5 сая ам.долларын буцалтгүй тусламжийг үзүүлэхээр боллоо.

Эдгээр аймгуудын 40 мянган малчин өрх энэ тусламжийг хүртэнэ. Тодорхой хэлбэл, нэг өрхөд 300 мянган төгрөгийн үнийн дүн бүхий тэжээлээр хангахаар боллоо.

Эх сурвалж: Монгол Улсын Шадар сайдын Ажлын алба