2030 оны Азийн XXI наадам Катарын Доха хотноо болно

Азийн олимпийн зөвлөл (ОСА)-ийн 39 дүгээр ерөнхий ассамблей нь 2020 оны 12 дугаар сарын 16-ны өдөр Оман улсын нийслэл Мускат хотноо цахимаар хуралдаж, тус зөвлөлийн гишүүн 45 Үндэсний олимпийн хорооны төлөөлөгчдийн санал хураалтаар 2030 оны Aзийн XXI наадмыг зохион байгуулах хотыг эцэслэн сонголоо.

Aзийн XXI наадам Катарын Доха хотноо явагдах боллоо гэж МҮОХ-ноос мэдээллээ. Доха хот өмнѳ нь Азийн XV наадмыг амжилттай зохион байгуулсан билээ. Хурц өрсөлдөөний дараа Дохад ялагдсан Саудын Арабын Рияад хот 2034 оны Азийн наадмыг хүлээн авах боллоо.

Персийн булангийн баян хотын нэг Доха нь 2006 оны Азийн олимпийг Арабын ертөнцөд анх удаа амжилттай зохион байгуулсан туршлагатайгаас гадна хоёр жилийн дараа дэлхийн хөлбөмбөгийн цом булаалдах тэмцээнийг Катарт хүлээн авахаар шаргуу бэлтгэж буй билээ.

Энэтхэгийн Дели хотоос 1951 онд гараагаа эхэлсэн Азийн наадамд Монголын баг тамирчид "Тегеран-1974" наадмаас анхлан оролцож, 11 удаагийн тивийн олимпоос нийт 25 алт, 46 мөнгө, 91 хүрэл, нийт 162 медаль хүртсэн түүхтэй. Харин өргөн дэлгэр Ази тивийн 2022, 2026 оны спортын цэнгэл их баяр наадмыг Хятадын Ханжоу, Японы Аичи ба Нагоя хотууд хүлээн авна.
 

Түүнээс гадна хуралд оролцогчид нь Сань-Яа- 2021 Азийн элсний спортын VI наадам , Бангкок-Чонбүри -2021 Азийн танхимын ба тулааны спортын VI наадам, Шаньтоу-2021 Азийн залуучуудын III наадам, Ханжоу-2022 Азийн XIX наадмын Зохион байгуулах хороод ба АОЗ-ийн 17 салбар комиссийн тайлан илтгэлийг хэлэлцэж, буcад тулгамдсан асуудлаар санал бодлоо солилцлоо.

АОЗ-ийн цахим хуралдаанд МҮОХ-ны Ерөнхийлөгч Н.Түвшинбаяр, ерөнхий нарийн бичгийн дарга Э.Бадар-Ууган нарын төлөөлөгчид оролцлоо гэж МҮОХ-ноос мэдээллээ.