Какүрюү 3-р сард зодог тайлах эсэхээ шийднэ

Энэ сарын 10-нд Токиод эхлэх мэргэжлийн сүмогийн Нэгдүгээр сарын тэмцээнд ёкозүна Какүрюү гэмтлийн улмаас оролцохгүй болжээ. Өнгөрсөн 11 дүгээр сарын тэмцээний дараа Ёкозүнагийн зөвлөлөөс олон тэмцээнд оролцохгүй байна гэсэн сануулга хүртсэн ч нурууны гэмтэл бүрэн эдгээгүй байгаа тул зодоглохгүй болж байгаа юм. Дутуу эдгэсэн гэмтэлтэй, бэлтгэл хангалтгүй оролцоод 50 хувийн амжилт үзүүлэхгүй бол зодог тайлахаас өөр аргагүйд хүрэх тул энэ удаад өнжиж, Хаврын тэмцээнд оролцох шийдвэр гаргасан байна. Ёкозүна Хакүхо коронавирусний халдвар авсан байгаа учир ийнхүү гурван башё дараалан, ёкозүнагүй тэмцээн болох гэж байна.

Какүрюүгийн багш Мичинокү ояката “Энэ сарын 7-ны орой Какүрюү утсаар ярьж, барилдах боломжгүй болсноо мэдэгдсэн. Бэлтгэл дутуу байгаа гэж би бодож байна. Залуу бөхчүүдтэй бэлтгэл хийсэн ч барилдааны бэлтгэл хийх хэмжээнд хүрч чадсангүй. Бэлтгэл дээр барилдаж чадахгүй байхад тэмцээнд оролцоход хэцүү. Хаврын тэмцээнд амжилтгүй барилдвал зодог тайлах болно гэдгээ Какүрюү өөрөө ч сайн ойлгож байгаа. Гуравдугаар сарын тэмцээнд бэлтгэхийн тулд юуны өмнө гэмтлээ бүрэн эмчлэх” гэж сэтгүүлчдэд мэдээлжээ.