Хойд Солонгосын Роналду нутаг буцахаас өөр аргагүй болжээ

“Хойд Солонгосын Роналду” хэмээн нэрлэгддэг Хан Кван Сон тоглох баг олдохгүй болсны улмаас эх орондоо харихаас өөр аргагүй болжээ. НҮБ-ын БНАСАУ-ын эсрэг авсан хориг арга хэмжээнд тэр өртсөн байна. АНУ болон НҮБ-иас энэхүү хоригийн хүрээнд гадаад ажиллаж байгаа Хойд Солонгосын ажилчдыг хүлээн авахгүй байх шийдвэрийг гаргаад байгаа билээ.

Хан Кван Сон Катарын “Аль-Духаиль” багт тоглож байсан ч өнгөрсөн 9 дүгээр сард дээрх шийдвэрийн улмаас багаас хасагдсан байна. Түүнийг авах баг олдоогүй тул Хойд Солонгостоо буцахаар болжээ. Малайзийн багт зээллэгээр тоглох гэсэн боловч бүтсэнгүй.

“Аль-Духаиль” баг өнгөрсөн жилийн нэгдүгээр сард түүнийг Италийн “Ювентус” багаас 6 сая ам.доллароор худалдан авч, 2024 оны зургаадугаар сарын 30 хүртэл гэрээ байгуулаад байсан юм.

Хан Кван Сон 2015 онд The Guardian-аас гаргасан Дэлхийн ирээдүйтэй 50 тоглогийн жагсаалтад багтаж байв. Италийн “Ювентуст”-д байхдаа жилийн 1 сая 600 мянган еврогийн цалингаасаа 2 сая вон л үлдээж, бусдыг нь Хойд Солонгосын засгийн газртаа тушаадаг байсан гэдэг. Энэ нь НҮБ-ын Хойд Солонгос гадаад дахь ажилчдын илгээдэг мөнгийг цөмийн зэвсэг бүтээх хөрөнгөд ашиглаж байна гэсэн шүүмжлэлд хамрагдсан хэрэг болсон байна.

Соноос гадна Австрийн Санкт-Пёльтен багийн Пак Кван Рён, Италийн Serie C лигийн Ареззо багийн Choe Song-hyok нарын Хойд Солонгосын хөлбөмбөгчид гэрийн зүг хүлгийн жолоо залах боллоо.

Хан Кван Сон 22 настай. 2017 онд Италийн “Кальяри”-д элсэж, 2017 оны дөрөвдүгээр сарын 2-нд “Торино”-гийн хаалганд гоол оруулан, Италийн лигт гоол хийсэн анхны Хойд Солонгосын тоглогч болж байв.