Хакүхо: Үнэр мэдрэхээ болиод шинжилгээ өгсөн

Шинэ төрлийн коронавирусний халдвар авч, нэгдүгээр сарын тэмцээнд барилдаагүй их аварга Хакүхо өнөөдөр бэлтгэлийн дараа сэтгүүлчдэд ярилцлага өглөө.

Халдвар авснаа мэдсэн нь нэгдүгээр сарын 3-нд шинэ оны анхны бэлтгэлийн үеэр гэнэ.

“Хорь орчим барилдана даа гэж бодоод бэлтгэл хийж байтал 10 барилдаад л амьсгаа давхцаад илүү чадаагүй. Хачин юм даа гэж бодоод. Бэлтгэлийн дараа чянко идэх гэж байтал Энхо “Муухай үнэртэй будаа вэ” гэж хэлэхийг сонслоо. Үнэртээд үзтэл ямар ч үнэр мэдрэгдсэнгүй. Ингээд л коронавирус гэж мэдээд шинжилгээ өгсөн. Миний хувьд үнэрлэх мэдрэмж алдагдсан төдийгөөр өнгөрсөн ч хаана, хэзээ авснаа огт мэдэхгүй. Коронавирус ч аюултай эд юм” гэж ярьжээ.

5-ны өдөр хариу эерэг гарахад “Яагаад би гэж” гэж шоконд орсон гэнэ. Ес хоног эмчлүүлээд эдгэрч, одоо биед ямар нэг зовиур, өөрчлөлт байхгүй, бэлтгэлдээ орсон байна.