Ёкозүнагийн зөвлөл: Какүрюү өөрөө зодог тайлах ёстой

Мэргэжлийн сүмогийн ёкозүна Какүрюү маргааш эхлэх Хаврын тэмцээнд зодоглохгүй болсон мэдээ сүмогийн ертөнцийг доргиолоо. Уг нь Какүрюү энэ тэмцээнд барилдаж, зодог тайлах эсэхээ шийднэ, бэлтгэл хийж байгаа гэж ярьж байсан юм. Какүрюү сүүлийн 5 башёд гэмтлийн улмаас барилдаагүй байгаа. Зарим хэвлэлд гарсан мэдээгээр тэр 9-ний өдрийн бэлтгэл дээр зүүн хөлөө гэмтээсэн гэнэ. 

Сүмогийн холбооны Ёкозүнагийн зөвлөлийн гишүүн, Токио их сургуулийн профессор Ямаүчи Масаюки энэ талаар Спорт Хочи сонинд ярилцлага өгчээ.

-Какүрюү таван тэмцээн дараалан барилдсангүй. Энэ талаар таны бодол?

-Сүмо бөхийн холбооны дүрмэнд ёкозүна цолтон ингэвэл зодог тайлна гэсэн заалт байхгүй. Ёкозүна цолоо алдах гэсэн дүрэм ч үгүй. Гэхдээ энэ нь сайн муу барилдах, өнжих нь хамаагүй үргэлжийн мөнх барилдаад байна гэсэн үг биш. Бусад бөхчүүдтэй ижил зодог тайлах цаг нь ирэхээр дохёгоо орхидог. Өдий хүртэл аваргууд амжилт буурч, хүч чадал харих үедээ өөрөө зодог тайлах шийдвэр гаргадаг байсан. Какүрюү ч гэсэн одоо өөрөө зодог тайлах шийдвэр гаргах ёстой цаг иржээ.

-Ёкозүнагийн үүрэг хариуцлага гэж бий.

-Ёкозүна хүн ялах үүрэгтэйгээс гадна дохёнд гарах ёслол үйлдэх том ажилтай. Үндэсний спортын хувьд аварга нь ард түмний итгэлийг хариулж чаддаг байх ёстой. Какүрюү бол сүмо бөхчүүдийн зөвлөлийн тэргүүн хүн тул бусад бөхчүүдийг удирдан, үлгэр жишээ үзүүлэх үүрэгтэй. Ийм удаан барилдахгүй байгаа аварга яаж бөхчүүдэд үлгэр дууриал болох вэ.

-Ер нь зодог тайлах ёстой юу?

-Хэн нэгний шахалтаар зодог тайлах нь ёкозүна гэдэг цол, байр сууринд таарахгүй. Какүрюү бол ёс заншил сайн мэддэг, мэндлэх хүндлэх ёс сайтай бөх. Ёкозүна ямар байх ёстойг ч сайн мэддэг хүн. Тийм болохоор Какүрюү ард түмний итгэлийг хөсөрдүүлэхгүйн тулд өөрөө шийдвэр гаргах хэрэгтэй. Сүмо бөхийн түүх, уламжлалыг хадгалан үлдэхийн тулд юу хийхээ тэр мэдэж байгаа гэж найдаж байна.