54 настай талбайд гарсан Х.Оюунбилэгийг дэлхий дахин онцоллоо

Өнгөрсөн жил Монголын хөлбөмбөгийн Дээд лигийн Сүмида-Жипро, Улаанбаатар багуудын тоглолтод Сүмида-Жипро багийн хамгаалагч Х.Оюунбилэг 54 настайдаа талбайд гарж, нэгэн рекорд амжилт тогтоосон билээ.

Тэр үед түүний талаар Японы СпоНичи сонин, Eurofootball сайт бичиж байсан бол энэ удаад Олон улсын хөлбөмбөгийн түүх, статистикийн холбоо IFFHS онцолжээ.
 

Энэ сарын 10-нд Японы хөлбөмбөгийн домог Казүёши Миүра 54 нас 12 хоногтойдоо Лигийн тоглолтод оролцсон билээ. Үүнтэй холбогдуулан тус холбооноос мэргэжлийн лигт одоо тоглож байгаа 50-иас дээш насны тоглогчдын талаар бичсэн байна. Гэхдээ зөвхөн мэргэжлийн дээд лигийн тамирчдыг оруулжээ.
 

Дээд лигийн тамирчдаас хамгийн ахмад нь Теркс, Кайкос улсын "Шаркс" багийн хамгаалагч Кристофер Брайан юм.

Тэр 2020 оны нэгдүгээр сард 59 нас 68 хоногтойдоо талбайд гарч, бүтэн 2 үе тоглосон. Тэрээр 1999-2007 онд улсынхаа шигшээд тоглож байжээ.

Харин манай Х.Оюунбилэгийн талаар “Хандсүрэнгийн Оюунбилэг 2020 оны есдүгээр сард 54 нас 247 хоногтой байхдаа хамгаалагчийн хувиар талбайд сэлгээгээр гарсан. Уг нь тэр хаалгач ч багийн тамирчид маш олноор гэмтсэн тул хамгаалагчаар тоглосон юм. Тэр Монголын дээд лигийн Сумида-Жипро багт тоглодог. 1981 онд замналаа эхэлсэн. Монголчууд түүнийг хамгийн ахмад мэргэжлийн хөлбөмбөгч гэж үзэн, Японы Миүрагаас илүү гэж тооцдог. Гэхдээ Казү Миүра 1986 онд Бразилын алдарт Сантост мэргэжлийн хөлбөмбөгч болж, 1980, 1990, 2000, 2010, 2020-иод онд тасралтгүй тоглосон. Харин Х.Оюунбилэг хоёр удаа зодог тайлж байсан. Хоёр дахь удаагаа зодог тайлаад 12 жилийн дараа эргэн ирсэн юм. Тэр 1980, 1990, 2010-аад онд тоглосон тамирчин” гэж бичжээ.