Монгол охид ДЭЛХИЙН ЧАНСААГ ТЭРГҮҮЛЖ байна

Ц.Энхтүвшин , “Таван цагариг”

Олон улсын сагсанбөмбөгийн холбоо( FIBA)-ноос 2021 оны дөрөвдүгээр сарын долооны байдлаар 3Х3 сагсанбөмбөгийн чансааг шинэчлэн гаргалаа.

Холбоо, эрэгтэй болон эмэгтэй шигшээ баг, U-23 буюу 23 нас хүртэлх эрэгтэй, эмэгтэй, U-18 эрэгтэй, эмэгтэй гээд долоон ангилалд чансааг зарласан бөгөөд манай U-23 эмэгтэй баг дэлхийн чансааг тэргүүлж, U-23 эрэгтэй баг гуравт, эмэгтэй шигшээ баг наймд, эрэгтэй шигшээ баг есд, харин U-18 ангилалд эмэгтэй баг есд, эрэгтэй баг 54-д эрэмбэлэгдлээ. Мөн эдгээр ангиллын нийлбэр буюу Холбооны (Улс) ангилалд Монгол долоод бичигдсэн байна.
 

Дашрамд өгүүлэхэд, 3Х3 сагсанбөмбөгийн төрөл “Токио-2020” олимпийн наадмын хөтөлбөрт анх удаагаа багтсан бөгөөд Монголын эмэгтэй баг олимпод оролцох эрхээ хэдийнээ аваад байгаа бол эрэгтэй баг тавдугаар сарын 26-30-нд Австрийн Грац хотноо болох Олимпийн эрх олгох ( 20 баг) тэмцээнд оролцох бөгөөд медальт байрт шалгарвал Токиог зорих эрхтэй болох юм.

Хэрэв энэ тэмцээнээс эрхээ авч чадаагүй тохиолдолд зургадугаар сард Унгарын Будапешт хотноо болох шилдэг зургаан багийн тэмцээнд( Манай эрэгтэй баг шилдэг зургаад оролцохоор шалгарсан) түрүүлж байж олимпийн эрхээ өвөртлөх болзолтой.