Монгол бөхчүүдийн өнөөдрийн барилдааны бичлэг

“Токио-2020” зуны олимпийн XXXII наадмын олимпийн эрх олгох чөлөөт бөхийн Ази тивийн эрх олгох тэмцээн Казахстаны Алматы хотод үргэлжилж байна. Өнөөдөр эрэгтэй зургаан жингийн барилдаан боллоо. Эрчүүдээс 125 кг-ын жинд ОУХМ М.Лхагвагэрэл Токиогийн олимпын эрх авч, бусад нь чадсангүй.

57 кг-д ДАШТ-ий хүрэл медальт ОУХМ Т.Түвшинтулга “Рио-2016” олимпийн наадмын мөнгөн медальт Японы Рэй Хигүчитэй таарсан ч япон бөх жиндээ орж чадсангүй. Дараагийн тойрогт БНХАУ-ны Ли Минхуд 1:2-оор ялагдснаар олимпын эрхгүй болж, хүрэл медалийн төлөө барилдах болсон. Жин их хассан нь нөлөөлөх шиг боллоо.

74 кг-ын жинд залуучуудын ДАШТ-ий хүрэл медальт ОУХМ Бямбасүрэнгийн Бат-Эрдэнэ 1/4 шигшээд ДАШТ-ий хошой хүрэл медальт, Азийн дөрвөн удаагийн түрүүтэй Узбекистаны Бекзод Абдурахмановт оноогоор цэвэр (0:10) ялагдлаа.

86 кг-д 23 хүртэлх насны ДАШТ-ий хүрэл, насанд хүрэгчдийн Азийн АШТ-ий хүрэл медальт ОУХМ Ганбаатарын Ганхуяг мөн шөвгийн наймд “Ташкент-2014” ДАШТ-ий мөнгөн медальт Японы Сосүкэ Такатанид 1:2-оор ялагдав.

97 кг-ын жинд Азийн АШТ-ий мөнгөн медальт ОУХМ Ө.Батзул тэгшитгэлийн барилдаанд 2017 оны Азийн АШТ-ий хүрэл медальт, залуучуудын Азийн аварга БНСУ-ын бөх Сёо Мин Вонтой хүч үзэж 1:2-оор ялагдлаа.