Залуучуудын ДАШТ: Манай хоёр боксчин медалийн төлөө тулалдана

Боксын залуучуудын үндэсний шигшээ баг Польш улсад болж байгаа залуучуудын Дэлхийн аварга шалгаруулах тэмцээнд оролцож байна. Дасгалжуулагч Т.Чулуунтөмөр, Жамантай Еркин, Т.Ганзориг нар эрэгтэй 4, эмэгтэй 4 тамирчинтай Польшийн Hala Legionow цэнгэлдэхэд хүч сорьж байгаа билээ.

Өчигдөр (2021.04.18) манай нэг боксчин рингэнд гарсан.

Эрэгтэй 69 кг-ийн жингийн 1/8 финалд манай тамирчин А.Жандос Ираны Фархад Морадитай тулалдаж, 0:5 ялагдлаа. Моради энэ жинд түрүүлэх хамгийн магадлалтай тамирчны тоонд Украины Юрий Захарьевын хамт нэрлэгдээд байгаа боксчин юм.

Харин өнөөдөр буюу Залуучуудын дэлхийн аваргын тэмцээний 7 дахь өдөр хоёр тамирчин маань хүрэл медалийн төлөө тоглоно.

Эмэгтэй 51кг жинд Боксын ҮШБ-н тамирчин Алтанбек Хулан Казакстаны тамирчин Гулнар Тупарбаеватай  "В" рингэнд Монголын цагаар 24:00 тоглоно.

Алтанбек Хулан Украины Хутарина Дарьяаг 4:1 ялж, шалгарсан билээ.

Эрэгтэй 52 кг жинд ҮШБ-н тамирчин Энхзоригтийн Сүхбат-Испаний тамирчин  Хуан Патонхатай "В" рингэнд Монголын цагаар 01:45 тоглоно.

Э.Сүхбат энэ тэмцээнд Энэтхэг, Германы тамирчдыг ялсан.

Уншигч та бүхэн энэ хоёр тоглолтыг https://www.youtube.com/watch?v=UdgNea6sciA холбоосоор шууд үзээрэй.