ХАКҮХО АВАРГЫН ЭМЧ: Би одоо чадах бүхнээ хийж байна

Ёкозүна Хакүхо хүнд гэмтлийн улмаас тавдугаар сарын Зуны тэмцээнд барилдахгүй гэдэг өнгөрсөн гуравдугаар сард тодорхой болсон.

Их аварга баруун өвдөгний хуучин гэмтлээ сэдрээсний улмаас Хаврын тэмцээний гурав дахь өдөр тэмцээнээс гарсан. Тэмцээний үеэр хагалгаа хийлгэж, одоо нөхөн сэргээх эмчилгээнд ороод байгаа билээ.

Хакүхогийн гэмтлийн талаар "Спортс Хочи" сонины сурвалжлагч мэс заслыг гардан хийсэн эмч Сүгимото Казүтакатай уулзан ярилцжээ.
 

-Хаврын тэмцээний өмнө Хакүхо аварга гэмтлээ сэдрээсэн байсан уу?

-Үнэнийг хэлэхэд гуравдугаар сарын тэмцээн эхлэхээс долоо хоногийн өмнө байдал маш муу байлаа. Өвдгөнд нь ус хуралдаж, соруулан аваад байхад дахиад хуралдана. Ус нь мөгөөрсний хэлтэрхий ихтэй. Мөгөөрөс урагдсан гэдгийг би мэдэж байсан. Өдөр бүр мэдээ алдуулагч тариад өвдөгний дотор талыг угааж, мөгөөрөс, ясны хэлтэрхий, хаягдал, цус, үрэвслийг гадагшлуулсаар ямар ч гэсэн хөдөлдөг болсон.

-Нэгдүгээр сарын тэмцээний өмнө аварга коронавирусний халдвар авсан. Хакүхогийн  дасгалжуулагч Ооба Томонари үрэвсэл эдгэрэхгүй удаж байгаад их гайхаж байна гэж байсан. Коронавирус нөлөөлсөн үү?

-Корона тусаад эдгэсэн ч үе мөчний үрэвсэл нь эдгэрэхгүй байгаа хүн олон бий. Яагаад ч юм ус хуралдаад л. Би эхлээд хөдөлгөөн дутагдсанаас болов уу гэж бодож байтал тамирчин биш энгийн хүнд ч энэ шинж тэмдэг ажиглагдаж байсан болохоор коронавирусний нөлөө байна гэж дүгнэсэн.

-Гэхдээ аварга Хаврын тэмцээнд зодоглосон...

-Хаврын тэмцээнд барилдахаа болих гэж бодсон үе бол бий. Гэхдээ Хакүхо 2011 оны гуравдугаар сарын 11-ний тэр нэгэн байгалийн гамшгийн талаар их гүнзгий бодолтой хүн. Барилдаж, түрүүлэх ёстой гээд л. Гэхдээ энэ удаад үнэхээр өвдөгний гэмтэл зодог тайлж магадгүй хэмжээний айхтар байсан.

-Хоёр дараалж даваад гурав дахь өдөр нь барилдаагүй шүү дээ?

-Тэмцээний эхний өдөр өвдөгний усыг соруулж авсан. Хоёр дахь өдөр нь давчихаад суухад өвдөг нь нугарч өгөөгүй. Өвчин намдаагч тариад үргэлжлүүлэн барилдаж болох ч тэгвэл ёстой Хаврын тэмцээнд зодог тайлах болох байлаа. Хамаагүй барилдвал өвдөг байхгүй болно. 15 өдөр ялаад байна гэсэн баталгаа байхгүй. Өвчин намдаагчаар өвчингүй болгож болох ч хөдөлж өгөхгүй бол ялахгүй шүү дээ. Шөнийн нэг цаг хүртэл Миягино ояката, Хакүхо аваргатай гурвуулаа ярилцлаа. Бэртлээ дахин нэг сайн эмчлээд барилдах уу, энэ тэмцээнд үхэх, сэхэхээ үзэх үү? Түүнд энэ хоёроос өөр сонголт байгаагүй.

-Хакүхо эргэлзэж байв уу?

-Барилдах тал дээр бол Хакүход эргэлздэггүй. Гэхдээ ялагдаад зодог тайлах хүсэл байхгүй. Тэгэхээр ялж зодог тайлахын тулд юу хийх хэрэгтэй вэ? Хаврын тэмцээнд хоёр өдөр ялаад байгаа тул одоо зодог тайлах уу? Эсвэл гэмтлээ дахин нэг эдгээгээд барилдаж, даваад зодог тайлах уу? Тэр шөнө бид мэс засалд орох хэрэгтэй гэж шийдсэн. Харин Хакүхо “Ялж давахаар зодог тайлах хүсэлгүй болж магадгүй шүү” гэж хэлж байлаа.

-Гуравдугаар сарын 19-нд дурангийн мэс засалд орсон. Хагалгаанаас хойш нэлээд хугацаа өнгөрлөө. Одоо байдал ямар байна?

-Одоо байдал хэвийн байгаа. Гэхдээ Хакүхо хөдөлгөөнгүй амрах хэрэгтэй байна. Хаврын тэмцээнээс гарсныхаа хоёр хоногийн дараагаас л хүчний бэлтгэл хийгээд сууж байсан. “Та мэс засал хийгээд, намайг эдгээчихнэ шүү дээ. Хагалгааны дараа 2-3 хоног хөдөлж болохгүй тул тэр өдрийнхөө бэлтгэлийг одоо хийж байна” гэж тэр хэлсэн. Дөрөвдүгээр сарын 21-нд MRI шинжилгээ хийхэд яс мөгөөрс нөхөн төлжиж эхэлсэн байсан. Хакүхо ч их баярласан.

-Бэлтгэл дээр дохёны мэдрэмжээ сэргээх гэж алхаж эхэлсэн гэж сонссон.

-Эхлээд нөхөн сэргээх эмчилгээ хийнэ. Дараа нь бэлтгэл, тэгээд барилдах гэсэн дарааллаар эмчилгээ явагдаж байгаа. Өвдгөнд ачаалал өгөхгүй бэлтгэлийг 14 хоног хийгээд, бага багаар ачаалал өгнө. Олон жил барилдсан болохоор аваргын бие элдэв гэмтэл их. Барилдааны бэлтгэлийг зургаадугаар сараас эхлэхээр төлөвлөж байгаа. Нагоя башё эхлэхээс 21 хоногийн өмнө барилдаж эхэлбэл амжилт гэж би үзэж байгаа.
 

-Яагаад заавал долоодугаар сарын тэмцээнд барилдана гэж шийдэв? Есдүгээр сард байж болох байсан биш үү?

-Есдүгээр сард барилдах зорилго тавьбал Хакүхогийн сэтгэл зүй маш хүнд байх байсан. Бараг даахгүй байх байсан болов уу. Есдүгээр сар хүртэл эмчлүүлээд барилдана гэсэн бол Хакүхо зодог тайлах байсан ч байж магадгүй. Түүний зан аашийг мэддэг болохоор би долоодугаар сард барилдах зорилго тавьсан. Гэхдээ анагаах ухаан, эмнэлгийн шинжлэх ухааны үүднээс хэлэхэд долоодугаар сарын тэмцээнд барилдаж чадвал үнэхээр гайхамшиг шүү гэдгийг би хэлсэн.

Хакүхогийнх шиг гэмтэл эдгэртлээ бүтэн жил зарцуулдаг. Долоодугаар сард Нагоя башёд 100 хувь эдгэрээд барилдана гэж би хэлж чадахгүй. 85 хувь байх болов уу. Тийм болохоор би одоо чадах бүх зүйлээ хийж байна. Дээр нь Хакүхогийн бие, сэтгэлийн хүч зэрэг олон зүйлд найдан, долоодугаар сарын тэмцээнд барилдуулна гэсэн зорилго тавсан юм.