Хакүхогийн шавь, монгол залуу Жониданд түрүүллээ

Мэргэжлийн сүмо бөхийн Зуны тэмцээн Токио хотод үргэлжлэн явагдаж байна.

Өнөөдөр тэмцээний 13 дахь өдөр жонидан зиндааны түрүү бөх тодорлоо.
 

Жонидан зиндааны 35 дахь бөх Миягино дэвжээний Сэнхо Котомаэдаг ёритаоши мэхээр ялж, жонидан зиндаанд 7 даваатай түрүүллээ. Сэнхо бол япон аав, монгол ээжтэй. 18 настай, 185 см өндөр, 97 кг жинтэй. Чиба мужийн Ичихара хотод амьдардаг ч Улаанбаатарт төрсөн.
 

Тэрээр цэцэрлэгээс бага анги төгсөх хүртлээ Японд амьдарсан ч сүмо бөхийн секц дугуйланд хичээллэж байгаагүй гэнэ. Гэхдээ багшийнхаа ятгалгаар бага ангийнхны сүмогийн тэмцээнд орж, Зүүн Японы аварга шалгаруулах тэмцээний шилдэг 8-д орж байсан амжилттай. Дунд ангид орох үедээ Монголд буцаж, сагсан бөмбөгөөр хичээллэж байжээ. Ингээд ахлах ангид дэвшин суралцахаар болоод байхад нь 2019 оны тавдугаар сард их аварга Хакүхогоос урилга ирснээр ийнхүү Миягино дэвжээнд элсэхээр шийдсэн байна. Түүнийг бага ангиас нь ажиглан харж байсан сүмогийн секцийн багш нь Хакүход танилцуулж, их аварга зургийг нь үзээд авахаар шийдсэн ажээ. Аав нь бейсбол тоглодог байсан тул удам дамжсан тамирчин ч гэж хэлж болох. Багаасаа Японд өссөн, Монголд байхдаа япон хэлний “Сакура” сургуульд суралцаж байсан тул Японд дасаж зохих болов уу гэсэн зовлон үгүй.
 

Мэргэжлийн сүмод анхныхаа түрүүг авсан Сэнхо сэтгүүлчдэд “Багаасаа л сүмо болохыг мөрөөддөг байлаа. Хакүхо аваргыг шүтдэг, барилдааныг нь зэрагтаар үзээд унахаар нь уйлдаг хүүхэд байлаа. Одоо их аваргатай нэгэн дэвжээнд барилдаж байна. Аварга надад жин нэмэх хэрэгтэй гэж зөвлөдөг. Бэлтгэлээ сайн хийж, зиндаа ахихын төлөө хичээнэ. Хакүхо аварга шиг бөх болохыг хүсдэг” гэж ярьжээ.