Токио 2020: Бокс, сагсан бөмбөгийн шигшээ баг Токиод буулаа

Өнөөдөр "Токио-2020" олимпын наадамд оролцох Монголын баг тамирчдын эхний ээлж буюу Бокс, 3х3 сагсан бөмбөгийн баг тамирчид Япон улсыг зорилоо.

Эмэгтэй сагсан бөмбөгийн багийн бүрэлдэхүүнд Б.Солонго, Д.Ганзул, О.Хулан, Э.Чимэддолгор, М.Цэрэнлхам, Б.Болор-Эрдэнэ нар багтаад буй бөгөөд тэднээс дөрөв нь олимпийн наадамд улсаа төлөөлөн тоглох юм.

Боксын тамирчдын хувьд долоодугаар сарын 22-ны өдрийг хүртэл Шизүока мужийн Шимада хотод, 3х3 сагсан бөмбөгийн баг тамирчид 19-нийг хүртэл Яйзү хотноо бэлтгэлээ хийх юм. 

"Токио-2020" зуны XXXII олимпын наадмын нээлтийн үйл ажиллагаа долоодугаар сарын 23-нд болох бол тэмцээнүүд 21-ний өдөр хөл бөмбөг, бэйсбол, гимнастикийн төрлөөр эхэлнэ. Харин бокс болон 3х3 сагсан бөмбөгийн тэмцээн 24-ний өдөр эхлэх хуваарьтай.

Монгол Улсаас Ахлах дасгалжуулагч ОУХМ Ж.Энхтөр, “Алдар” спорт хорооны дасгалжуулагч, гавьяат дасгалжууулагч А.Гантулга нар баг тамирчдаа дасгалжуулж, эрэгтэйчүүдийн 57 кг жинд үндэсний шигшээ баг, ШШГЕГ-ын харьяа “Сүлд” спорт хороо болон Ажнай корпорацийн тамирчин, гавьяат тамирчин Э.Цэндбаатар, эрэгтэйчүүдийн 63 кг жинд ҮШБ, Зэвсэгт хүчний “Алдар” спорт хороо болон Капитрон банкны тамирчин, ОУХМ Б.Чинзориг, эмэгтэйчүүдийн 75 кг жинд ҮШБ, Уулын баяжуулах Эрдэнэт үйлдвэрийн “Хангарьд” спорт хорооны тамирчин, ОУХМ М.Мягмаржаргал нар эх орноо төлөөлөн оролцоно.

Монголын боксчид олимпын наадмаас 1 алт, 2 мөнгө, 4 хүрэл медаль хүртсэн бөгөөд Дэлхийн аварга шалгаруулах тэмцээнээс 1 алт, 4 мөнгө, 6 хүрэл медальтан төрсөн билээ.