Х.Болдбаатар: Алтан медальд хүрч чадаагүй ч чамлахааргүй оролцлоо

Манай сэтгүүлч М.Сугар-Эрдэнэ Токио хотоос мэдээлж байна

Монголын жүдо бөхийн шигшээ баг Токиогийн олимпод Монголын тамирчдын салхийг хагалж, хамгийн түрүүнд тэмцээндээ орсон. Мөн хамгийн анхны медалийг ч авчирсан билээ.

Жүдочид 1 мөнгө, 2 хүрэл медальтай тэмцээнээ дуусгасан.

Өнөөдөр тэд холимог багийн барилдаанд өрсөлдөж, БНСУ гэсэн хүчирхэг багийг ялсан ч ОХУ, Германы багт дараалан ялагдаж, медальд хүрж чадсангүй. Иинхүү эрэгтэй 81 кг-ийн жинд Саид Моллаи мөнгө, эмэгтэй 48 кг-д М.Уранцэцэг, эрэгтэй 73 кг-д Ц.Цогтбаатар хүрэл медаль хүртсэн амжилтаар манай жүдочдын Токиогийн олимп өндөрлөж байна.

Монголын Жүдо бөхийн шигшээ багийн ахлах дасгалжуулагч Х.Болдбаатартай тэмцээний дараа уулзаж, сэтгэгдлийг нь сонслоо.

-Багийн тэмцээн өндөрлөлөө. Харамсалтай нь, манай баг медальд хүрч чадсангүй...

-Холимог багийн тэмцээнд БНСУ-ын хүчирхэг, том багийг ялж чадсан. Медаль авна гэж итгэж, найдаж байсан ч “Унасан бөхөд шалтаг  мундахгүй” гэгчээр хэд хэдэн зүйл тохиолдлоо. Д.Сумъяа өмнөх барилдаанд мөрөө гэмтээж орхисон нь өнөөдрийн барилдаанд нөлөөллөө. 100 хувь барилдаанаа гаргаж барилдаж чадсангүй.

-Манай жүдогийн шигшээ баг Токиогийн олимпод ямар зорилготой ирсэн бэ?

-Гол зорилго бол АЛТАН МЕДАЛЬ авах байлаа. Гэхдээ гурван медаль авсандаа баяртай байгаа. Бид өнгөрсөн жилийн хавраас хойш маш хүнд байдалд бэлтгэл хийсэн. Цар тахал, хорио цээр гээд л.

Оны эхээр бараг бэлтгэлгүй шахам Дохагийн "Мастерс" тэмцээнд оролцсон. Дараа нь гэр гэртээ бэлтгэл хийж байгаад сарын хугацаатай "Найрамдал" зусланд цугларалтад гарсан. Энд харин сайн бэлтгэл хийж чадсан ч Европын тэмцээнд оролцож байгаад багаараа ковид хэмээх аюултай өвчинд нэрвэгдсэн.

Сар гаруй хугацаанд тусгаарлагдан, бараг хоригдож байгаад Монголдоо ирсэн. Өвчнөөс болоод 100 хувийн ачаалал авах бэлтгэл хийж чадахгүй байлаа. Гэхдээ аль болох л бэлтгэл сургуулиа хийхийг хичээж байлаа.

ДАШТ-д оролцлоо, ер нь засаж янзалсаар байгаад олимпдоо оролцлоо. Нэг мөнгө, хоёр хүрэл медаль авч, нэгэн шинэ түүх бичсэндээ баяртай байна.
 

-Зарим тамирчин маань медаль хүртэж, заримынх нь медалийн өнгө өөрчлөгдөх ёстой байсан мэт санагдсан...

-Ё.Басхүүг хүрэл медаль авна гэсэн итгэлтэй байсан. Түүнийг Абэ Хифүмиг ч ялна гэж бодож байсан ч харамсалтай нь чадсангүй. Хүрлийн төлөө барилдаад бас ялагдсан. Цогоог ч гэсэн Оно Шёохэйг ялна гэж итгэж байлаа.

Г.Алтанабагана ч гэсэн чансааг тэргүүлэгч Испанийн бөхийг ялчих хэмжээнд байсан.

Манай бөхчүүдийн бэлтгэлжилт дажгүй сайхан байлаа. Залуучууд маань ч сайн байсан. Энэ завшааныг ашиглаад багийнхаа терапист Нишикидо гээд япон мэргэжилтэнд баярласнаа хэлмээр байна.

Гэмтэл бэртэл эдгээх, нөхөн сэргээлтийг маш сайн хийж байсан. Харамсалтай нь, олимпод ирж чадаагүй. Нишикидо, чиний ач гавьяа энэ медалиудад их бий шүү гэж хэлье.

Мөн Монголд үлдсэн багш нартаа талархсанаа хэлье.

Би шигшээ багт орсноосоо хойш дандаа залуу багш нартай хамт ажиллаж байгаа. Бид нягт хамтран ажиллаж чаддаг. Цугларалт дуусаад манай баг ковидийн шинжилгээ өгөх гэж ирэхэд манай холбооны тэргүүн Х.Баттулга маш зөв зохион байгуулалттай хүлээн авч, бэлтгэлийн сүүл хэсгийг сайн тавьж өгсөн гэдгийг хэлэх хэрэгтэй. Дутуу байсан зүйлүүдийг нөхөхөд дэм болсон. Энд ч гэсэн Ерөнхийлөгч маань найм хоног хамт бэлтгэл хийж, байрлаад, сэтгэл зүйн их дэм үзүүлж, зөвлөгөө өгч байлаа. Мөн бидний барилдааныг өдөр бүр үзэж, захыг нь мушгиж суусан ард түмэндээ баярлалаа. Алтан медаль авах зорилгоо биелүүлж чадаагүй ч тултлаа ажиллалаа гэж бодож байна.

-Баярлалаа.